(Казан, 16 июль, «Татар-информ»). Башкортстанда аномаль эсселек аркасында гадәттәгедән ике атнага иртәрәк урып-җыю эшенә керештеләр. Бу хакта төбәк башлыгы Радий Хәбиров сүзләренә сылтама белән «Башинформ» мәгълүмат агентлыгы хәбәр итә. Хәбиров көзге культураларның өлгерүен, әмма быел мул уңыш көтелмәвен әйтте. «Кояш кыздырды, яңгыр яумады. Башкортстанның күпчелек районнары корылыктан зыян күрде. Шул сәбәпле, республиканың 26 муниципалитетында гадәттән тыш хәл режимы кертелде», — диде ул. Бүгенгә уртача уңыш гектардан 15,3 центнер тәшкил итә. Яңгыр яуган районнарда уңыш ике тапкыр диярлек югары, ягъни гектарыннан 28 центнер тәшкил итә. Республика буенча уртача уңыш 1,5 тапкыр кимегән. Шул ук вакытта Хәбиров урып-җыю кампаниясе йомгаклары буенча аграрийлар республиканы ашлык белән тәэмин итәчәгенә ышаныч белдерде. Россия Президенты Владимир Путин туры линия вакытында «климат үзгәрешләрен исәпкә алып, авыл хуҗалыгы билгеләнешендәге кырларны мелиорацияләү актуальләшә» дигән иде. «Татар-информ» мәгълүмат агентлыгы хәбәр иткәнчә, дәүләт бу өлкәне финанслауны арттырачак һәм үстерәчәк, диде Россия лидеры.
