Саимә Ибраһимова белән хушлашу мәрасиме Тынычлык бистәсе зиратында булачак
(Казан, 20 июль, «Татар-информ», Рузилә Мөхәммәтова). Күренекле журналист, язучы Саимә Ибраһимова белән хушлашу мәрасиме Тынычлык бистәсе зиратында булачак.
«Саимә Ибраһимова иртәгә Казанның Тынычлык бистәсендәге зиратка җирләнәчәк. Хушлашу да шушы зиратта оештырыла», — дип хәбәр итте «Сөембикә» журналының баш мөхәррире Лариса Маликова.
Алдарак мәрхүмәнең җәсәде хастаханә моргыннан алыну вакыты хәбәр ителгән иде. Хушлашу урыны зиратта булуы ачыкланмаган иде.
Язучы, журналист һәм тәрҗемәче Саимә Ибраһимова озак еллар «Яшь ленинчы» газетасында эшләде. Аның соңгы эш урыны «Сөембикә» журналы иде.
Саимә Ибраһимова бүген вафат булды. Аңа 93 яшь иде.