(Казан, 11 сентябрь, «Татар-информ», « Өмет »). Россия Хөкүмәте рәисе урынбасары Марат Хөснуллин Ульяновскига эш сәфәре вакытында шәһәр яшьләре белән очрашты. Ул егет-кызларга төзүче һөнәренең үзенчәлекләре турында сөйләде. Әлеге очрашу илебез данлыклы кешеләренең яшьләр өчен лекция-экскурсияләре циклы кысаларында оештырылган иде. Аны Россиянең «Белем» («Знание») җәмгыяте үткәрә. Очрашуда Президентның «Россия — мөмкинлекләр иле» платформасына кергән «Твой ход» һәм «Большая перемена» проекты активистлары катнашты. Марат Хөснуллин төзелеш белән яшь чагыннан ук мавыгуы һәм башта — Татарстанда, аннары Мәскәүдә эшләп, 20 елдан артык гомерен шушы кәсепкә багышлавы турында сөйләде. Ул «Торак һәм шәһәр мохите» һәм «Сыйфатлы имин юллар» илкүләм проектларын тормышка ашыруның нәтиҗәләре белән дә таныштырды. «Бүген без 2030 елга кадәр бер миллиард квадрат метр торак мәйданы төзү максаты куябыз», — диде ул. Марат Хөснуллин 3D-йортлар һәм акыллы автомобиль юллары төзү серләре белән бүлеште һәм заманча архитектураның төп принципларына тукталды. «Миңа лекция-экскурсия форматы бик тә ошады. Шундый формаль булмаган аралашу яшьләргә һөнәрнең мөһим һәм кызыклы үзенчәлекләре турында белү, төзелеш тармагында карьера ясау серләренә төшенү мөмкинлеге бирә. Егетләр һәм кызларга хәзерге заман архитектурасы белән төзелешнең, беренче чиратта, югары технологияләр булуын һәм җитди белемле һәм бик күп махсус гыйлемнәргә ия булуны таләп итүен җиткерергә тырыштым», — диде ул.