(Казан, 28 сентябрь, «Татар-информ», Егор Никитин). Россия халык фронты яшьләр бүлекчәсенең Татарстан төбәк командасы Якутиядә урман янгыннары нәтиҗәләрен юкка чыгаруда ярдәм итте. Кыр шартларындагы эшләрдә «Молодежка ОНФ» бүлекчәсенең Татарстан вәкилләре Якутиядә зыян күргән бер авылда хәрабәләрне җыештырырга ярдәм иткән, дистәләгән йортны караган, шунда яшәүче 13 кешегә булышкан. Россия халык фронтының матбугат хезмәтендә сөйләүләренчә, эшләр Якутиядәге Бясь-Кюель авылы янында барган. Монда августның беренче яртысында янгын булган. Көчле җил аркасында ут корылмаларга күчкән һәм алты күпфатирлы йортка һәм 26 шәхси торакка зыян салган. «Молодежка ОНФ» бүлекчәсенең Татарстаннан катнашучылары җирле хакимият һәм Саха (Якутия) Республикасы хөкүмәте белән тыгыз элемтәдә булган. Көнкүреш ярдәм белән беррәттән, алар җирле хакимият белән бергә халыкка тернәкләндерү эшләрендә дә ярдәм иткән. Волонтерлар хәрбиләр белән бергә мөгезле эре терлек өчен булган ике хуҗалык корылмасын сүткән, янган урманның өчтән бер өлешен кискән һәм алга таба файдалану өчен яраклы материал әзерләгән. Эш көннәрнең берсендә Бясь-Кюель авылы хакимияте үтенече буенча ярдәмчеләр авария хәлендәге агач күперне сүткән, алга таба аны төзекләндерү планлаштырыла. «Күпер җәяүлеләр өчен түгел, машина йөри торган. Аны бөтен команда белән бергә сүтәргә туры килде. Аерым-аерым гына моны башкарып чыгып булмас иде», — дип сөйләде «Молодежка ОНФ» бүлекчәсенең Татарстан командасы вәкиле Игорь Чугуров. Якутиядәге беренче һәм соңгы көнне команда вәкилләре «Урманны саклыйк» бөтенроссия акциясе кысаларында яшь наратлар утырткан. «Бу акция юкка гына Якутиядә башланмады. Быел мондагы урманнар моңа кадәр булмаганча зыян күрде. Һәм бүген янгыннан соң табигатькә тернәкләнү өчен барыбыз да ярдәм итәргә тиеш. Бу бик авыр һәм файдалы командировка булды. Төрле эш башкардык: бистәдә юридик ярдәм дә күрсәттек, корылмаларны сүтү һәм хуҗалыкларны кире торгызу буенча физик ярдәм дә булды. Яшьләр чын-чынлап тырышты һәм аларның хезмәтен Якутиянең кырыс климаты да катлауландырды», — дип рәхмәт әйтте Россия халык фронтының Үзәк штабы әгъзасы, «Молодежка ОНФ» җитәкчесе Игорь Кастюкевич. Алдарак «Татар-информ» Россия Президенты Владимир Путинның Якутиядәге урман янгыннары нәтиҗәләрен юкка чыгару буенча йөкләмә бирүен язган иде. Алар арасында арасында төбәктә Гадәттән тыш хәлләр министрлыгы төркемнәрен ныгыту, зыян күргән җирле халыкка социаль ярдәм чараларын активлаштыру кебек йөкләмәләр бар иде. Август ахырында «Молодежка ОНФ» линиясе буенча Татарстан вәкилләренең Якутиягә җибәрелүе мәгълүм булды.
