Түбән Камада шагыйрь Ленар Шәех белән очрашу кичәсе булды
Түбән Камада танылган татар шагыйре, язучы, журналист һәм тәрҗемәче Ленар Шәех белән очрашу булды. Әдәби очрашу кичәләре «Кунакчыл Түбән Кама» проекты кысаларында Габдулла Тукай исемендәге үзәк китапханәдә һәм «Китаплы балачак» проекты кысаларында «Апуш» балалар китапханәсендә үтте. Китапханә системасы белгечләре кунак өчен документаль фильм әзерләгән иде. Фильмда Актаныш якташлары шагыйрь турында хатирәләре белән уртаклаша һәм аның тормышыннан кызыклы вакыйгаларны искә ала. Бу турыда Түбән Кама муниципаль районы рәсми сайтында хәбәр ителә. Китапханәчеләр сүзләренчә, Ленар Шәех - республика, Россия һәм халыкара премияләр лауреаты. Ул - бүгенге көндә әсәрләре инглиз теленә тәрҗемә ителгән бердәнбер татар язучысы.