Роспотребнадзор: Чаллыда склад янган урында һавадагы зарарлы матдәләрнең артуы күзәтелми
Бүген Чаллыдагы складларның берсендә янгын чыкты. Кулланучы хокукларын яклау һәм кеше иминлеге өлкәсендә күзәтчелек федераль хезмәтенең (Роспотребнадзор) Татарстан буенча идарәсенең җирле бүлеге белгечләре шунда ук якындагы торак йортлар тирәсендә һава пробаларын алды.
Үткәрелгән тикшеренүләр күрсәткәнчә, һавада зарарлы матдәләрнең күләме рөхсәт ителгән күләмнән артмый. Бу хакта «Татар-информ» агентлыгына Роспотребнадзорның ТР идарәсе матбугат хезмәтендә хәбәр иттеләр.
«Татар-информ» Чаллыда янгын сүндерүчеләрнең иртәнге дүрттән бирле склад территориясендә ут белән көрәшүе турында хәбәр иткән иде. Янып яткан резина һәм пластикны көндезге сәгать ун тирәсендә сүндерделәр.