Рөстәм Миңнеханов Иннополисны 10 еллык юбилее белән котлады
Татарстан Республикасы Президенты Рөстәм Миңнеханов Telegram-каналында Казанның иярчен-шәһәре Иннополисны 10 еллык юбилее белән тәбрик итте.
«Бүген Россиянең иң яшь шәһәре – Иннополис туган көнен билгеләп үтә! Бу – инновацияләр һәм заманча технологияләр, мәгариф һәм фән үзәге. Анда яшәүче кешеләр тагын да артсын, сәламәт һәм бәхетле булсын!» - дип язган Рөстәм Миңнеханов татарча. Һәм рус телендә: «Туган көнең белән, Иннополис!» - дип өстәгән.
Татарстан Президенты шулай ук видеоролик та урнаштырган. Анда Иннополис күренешләре шәһәрдә яшәүчеләр тормышындагы аерым мизгелләр белән алышына. Алар арасында яшьләрнең төрле шөгыльләре, көнкүрештә гаджетлардан файдалану, Университеттагы белем бирү процессы, пилотсыз очкыч ярдәмендә азык-төлек китерү һ.б. эпизодлар бар.
- Быел Иннополиста кешеләр яши башлаганга һәм рәсми ачылышына – җиде, төзелеш эшләренә старт бирелгәнгә ун ел тула.