Минскида Мостай Кәримнең «Ярлыкау» повесте буенча фильм төшерәләр
Минскида Мостай Кәримнең шул исемдәге повесте буенча «Ярлыкау» фильмын төшерәләр. Бу хакта фильмның режиссеры Айнур Әскәров хәбәр итте, дип яза «Башинформ» агентлыгы.
«Барысы да план буенча барса, биредә 7 июльгә кадәр булачакбыз, - дип искәртте Айнур Әскәров. – Кыскача әйткәндә, әсәрнең төп идеясе – әхлак һәм закон арасындагы каршылык».
Сценарий авторы Айдар Акманов «Башинформ» агентлыгына белдергәнчә, фильмның сценариен язу өчен бер елга якын вакыт киткән. Айдар Акманов Мостай Кәрим әсәрләре буенча төшерелгән башка фильмнарга да («Сеңелкәш», «Отряд Таганок») сценарийлар язган.
«Ярлыкау» повесте – Башкортстанның халык шагыйре, язучы һәм драматург Мостай Кәримнең иң күренекле әсәрләреннән берсе, ул узган гасырның 80нче елларында язылган. Ул чынбарлыкта булган реаль хәрби вакыйгаларга нигезләнеп иҗат ителгән.