Казан Кремленең Спас манарасындагы йолдызы реставрациягә җибәрелә
Казан Кремленең Спас манарасыннан реставрация өчен йолдызны алганнар.
Йолдыз Спас манарасына 1963 елда урнаштырылган. 60 ел эчендә җиздән ясалган йолдыз нурлары тузган, тутыккан һәм алыштыруны таләп итә. Белгечләр иске йолдыз үрнәгендә тутыкмый торган корычтан шундый ук йолдыз нурларын әзерләячәк, алар берничә дистә ел хезмәт итәчәк. Металлны коррозиягә каршы материаллар һәм титан нитриды белән каплаячаклар – шуның аркасында йолдыз алтын кебек ялтыраячак, дип хәбәр иттеләр ТР Мәдәни мирас объектларын саклау буенча дәүләт комитетында.
Йолдызны реставрацияләү детальләре турында экспертлар, тимерчелек эше осталары, подрядчылар һәм Спас манарасының реставрация эшләренә заказ бирүче вәкилләр бергәләп фикер алышалар.
Исегезгә төшерәбез, язын Спас манарасын реставрацияләү башланды.