Мәдәният министры Ирада Әюпова Фешин училищесында журналистларга экскурсия уздырды
Мәдәният министры Ирада Әюпованың матбугат вәкилләре белән традицион очрашуы Фешин исемендәге Казан сынлы сәнгать училищесында оештырылган иде.
Министр үзен яңа рольдә сынап карады - Фешин училищесының Карл Маркс урамындагы бинасында журналистлар өчен экскурсия уздырды. «Мин беренче мәртәбә зур төркем өчен экскурсия уздырам. Мин үз хис-тойгыларым белән бүлешергә телим», – дип башлады ул.
Мәдәният министры Казан мәгарифенең, бинаның һәм училище тарихы, исемнәре әлеге бина белән бәйле Мюфке һәм Фешин шәхесләре турында сөйләде. Бинага бәйле нечкәлекләр белән теманы училище директоры Ольга Гыйльметдинова тулыландырды.
Карл Маркс урамындагы әлеге бина өлешчә төзекләндерелгән хәлдә. Аның төзекләндерелгән өлешендә студентлар укый. Журналистларга бинаның төзекләндерелгән һәм әлегә төзекләндерү көткән өлешләрен күрсәттеләр.
Бинаны тулысынча төзекләндерү өчен тагын 600 млн сумнан артык акча сорала. Әлегә төзекләндерү сроклары һәм акча чыганаклары турында тәгаенләнгән мәгълүмат юк. Министр бу юнәлештә эш баруын гына әйтте.
Фешин исемендәге Казан сынлы сәнгать училищесы – Казанда иң зур конкурслы уку йортларының берсе.