Казанда көчле яңгырдан соң 800 йортта су беткән
Казанда көчле яңгырдан соң, Авангард урамы районында челтәрләрдә авария булган. 700 шәхси йортта һәм 110 күп фатирлы йортта, административ биналарда су беткән. Бу турыда шәһәр мэриясе хәбәр итте.
«Оператив рәвештә эшләр башкарылды, шулай да күп фатирлы 64 йорт, 140 шәхси йорт сусыз кала әле. Эшләр дәвам итә, су китерү оештырыла», диелә хәбәрдә.
Шәһәр хезмәтләре яңгырдан соң су ага торган канализацияне чүп-чардан чистарта, юллардан агачларны һәм ботакларны алалар.
«Мондый һава торышы булганда өйдә калырга, күз күреме начар булган килеш юлга чыкмый торырга киңәш итәбез», ди шәһәр хакимияте.