Кемерово өлкәсендә Татар мәдәнияте фестиваль-бәйгесе була
10 сентябрьдә Кемерово өлкәсендә төбәкара Татар мәдәнияте фестиваль-бәйгесе була. Чарага өлкәдән һәм башка төбәкләрдән егермедән артык милли татар коллективы җыелачак. Бу хакта Бөтендөнья татар конгрессы хәбәр итә.
Фестиваль вакытында татар милли-мәдәни үзәге һәм мәчет ачыла. Шулай ук Коръән, милли баш киемнәре, традицион милли костюмлы курчаклар күргәзмәсе була. Татар мәдәнияте иҗат коллективлары бәйгедән тыш программа тәкъдим итә.
Татар мәдәнияте бәйгесендә «Халык биюе» (кечкенәләр һәм зурлар төркеме), «Стильләштерелгән милли костюм», «Татар йорты һәм кунаклар кабул итү традицияләре», «Халык акылы», «Иң яхшы Коръән укучы» номинацияләрендә җиңүчеләр билгеләячәкләр.
Программада һөнәрчелек һәм аш-су мастер-класслары, концерт номерлары һәм бөтен гаилә өчен милли уеннар каралган.
Фестиваль «Томская писаница» музей-тыюлыгында уздырыла, диелә хәбәрдә.