Новости за 23.09.2022

Бүген Яшел Үзәндә беренче хәйрия пункты эшли башлады, анда аз керемле кешеләр бушлай кайнар ризык ашый алачак. Ул Татарстан урамында, 15а йорты адресы буенча, үзәк базардан ерак түгел урнашкан.

Шимбә көнне Татарстан территориясендә болытлы һәм җылы һава торышы көтелә. Татарстанның Гидрометеорология үзәге шул турыда хәбәр итте.

1 октябрьдән Россиядә дәүләт хезмәткәрләренең окладлары 1,04 тапкыр артачак. Бүген Россия Президенты Владимир Путин шундый эчтәлекле карарны имзалады.

Массакүләм мәгълүмат чараларында Россиядә яшәүче 1,2 миллион кешене мобилизацияләү турындагы хәбәрләр –  ялган, дип хәбәр итте Россия Президентының матбугат секретаре Дмитрий Песков.

Бүген Татарстан Республикасы Президенты Рөстәм Миңнеханов Кулланучы хокукларын яклау һәм кеше иминлеге өлкәсендә күзәтчелек федераль хезмәте (Роспотребнадзор) хезмәте оешуга 100 ел тулуга багышланган тантаналы чарада катнашты. Ул ведомство хезмәткәрләрен котлап, аларга ун «Лада»  автомобиле ачкычын тапшырды. Тантанада шулай ук идарәнең алдынгы белгечләре бүләкләнде. Бу хакта республика җитәкчесенең матбугат хезмәте хәбәр итә.

Бүген Дәүләт Советы депутатлары Татарстан һәм Мари Эл арасында чикләрне тәгаенләү турында килешүне раслады. Төбәкләр арасында чикләр 334 километр тәшкил итә.

Россиядә өлешчә мобилизация көндезге бүлекләрдә укучы студентларга кагылмаячак. Әмма читтән торып укучылар мобилизация комиссиясе карары буенча чакырылырга мөмкин, диелә «Объясняем.рф» порталында.

Бүген Татарстан Республикасы Президенты Рөстәм Миңнеханов Түбән Идел бассейны округы Бассейн советының XXVIII утырышы эшендә катнашты. Бу турыда Татарстан Президентының матбугат хезмәте хәбәр итте.

22 сентябрьдә кич белән Диния Нәзарәтендә мөселман яшьләре өчен оештырылучы проект — «MuslimQuiz» акыл уеннарының яңа сезоны ачылды.

IT-компанияләр һәм элемтә операторларының чакырылыштан кичектерелеп тору хокукы булган хезмәткәрләренә хәрби комиссариатка повестка белән барганда эш урыныннан белешмә дә алып килергә кирәк. Россиянең Цифрлы үсеш, элемтә һәм массакүләм коммуникацияләр министрлыгы хәбәрендә шул турыда язылган. Бу хакта РИА Новости хәбәр итә.

Данис Шакировның урынбасары Илгиз Халиков сүзләренчә, йөз еллык мәктәптә татар телен укыту беркайчан да туктамаган.

Башкортстан Журналистлар берлеге рәисе, «Башкортстан» газетасының баш мөхәррире Вәдүт Исхаков иҗади берләшмәнең моңа кадәр саналганга караганда күпкә иртәрәк оештырылганын ачыклавын әйтте. Моңа кадәр Башкортстан Журналистлар берлеге 1957 елда Уфада оештырылган дип исәпләнеп килде. Быел исә Вәдүт Исхаков архив документларыннан чыгып, берлекнең 1921 елның февралендә оештырылганын ачыклаганын әйтте.

Чакырылышның 26 сентябрьдән 10 октябрьгә, 11 октябрьдән 25 октябрьгә һәм 26 октябрьдән 10 ноябрьгә кадәр буласы өч дулкыны турында Омскидагы хәрби комиссариат хезмәткәре сөйләгән диелә. "Беркем качып кала алмый, беркемне дә онытмаячаклар, бөтен кешене табачаклар", дип белдергән ул.

Татарстан Президенты Рөстәм Миңнеханов Россия Федерациясе Табигый байлыклар һәм экология министрлыгы башлыгы Александр Козлов белән очрашты. Республиканың Хөкүмәт Йортында узган очрашуда яклар «Экология» илкүләм проектына кергән федераль проектларның һәм Татарстанда җирле сулыкларны саклау өчен үткәрелә торган башка чараларның үтәлешен бәяләде.

До торжественного открытия футбольного манежа с футбольной поляной остались считанные дни. Строители наносят последние дизайнерские штрихи. Фигура футболиста на стене, оформление информационных стендов.

Беренче бала өчен бирелә торган ана капиталының күләме 2025 елга 646 875,5 сумга кадәр артырга мөмкин. Россиянең Социаль фонды бюджетына аңлатма язуында шул турыда мәгълүмат бар. Документ белән РИА Новости танышкан.

2022 елның 8 ае эчендә Татарстанда 14 яшүсмер үз-үзенә кул салган, тагын 60 баланың тормыштан үз теләге белән китәргә омтылыш очраклары билгеле.

Онлайн курс дүрт белем бирү модуленнән һәм тесттан тора. Гомуми күләме – 20 академик сәгать.

Сезон ачылышында көн дәвамында театр бинасы янында аудиогазета яңгырап торачак. Артистлар театр тарихына бәйле иң кызыклы истәлекләре белән бүлешәчәк.

Җомга көнне рубль курсы үсешен көчәйтә, евро 21 июльдән соң беренче тапкыр 57 сумнан түбәнрәк төште. Мәскәү биржасы мәгълүматларыннан күренгәнчә, форекс динамикасы 20 еллык минимумны (0,975 доллар тирәсе) яңарта. РИА Новости шул турыда яза.

Бүген ТР Дәүләт Советы депутатлары балигъ булмаган үсмерләргә энергетик эчемлекләр һәм зажигалкалар сатуны тыю турындагы мәсьәлә буенча фикер алышты.

Альбер Борһанов фикеренчә, «Татарстан белән Башкортстан татар милләтенең ике канаты булса, Идел буе белән Урал һәм Көнбатыш Себер төбәкләре – ике аягы».

Мәгариф һәм фән өлкәсендә күзәтчелек буенча федераль хезмәт җитәкчесе башлыгы Анзор Музаев өлешчә мобилизация уку-укыту процессына йогынты ясамаячак, укытучылар һәм укучыларга кагылмаячак, дип белдерде. Бу хакта «РИА Новости» яза.

Биектау районындагы «Фәнни шәһәрчек» кушылу хисабына Казан территориясе киңәйтеләчәк. Бүген ТР Дәүләт Советында Татарстан муниципаль берәмлекләренең чикләрен үзгәртү белән бәйле закон проекты каралды.

Агымдагы елның гыйнварыннан алып августка кадәр Татарстанда торак йортлар төзелеше темпы узган ел белән чагыштырганда өчтән бер өлешкә арткан. Бу хакта Татарстанстат мәгълүматлары сөйли.