Социаль проектлар белән шөгыльләнүчеләрне Президент премиясенә бәйгедә катнашырга өндиләр
Татарстанда социаль-иҗтимагый тормышка үз өлешен кертүчеләр Татарстан Президенты премиясенә дәгъва кыла ала. Бүген төрле елларда социаль юнәлешле проектлары өчен шул премиягә лаек булганнар белән очрашу узды.
«Соңгы елларда район-шәһәрләрдә коммерцияле булмаган сектор үскәнен сизәбез. Быел «Коммерцияле булмаган секторны үстерү һәм ярдәм итү буенча муниципаль берәмлекләр рейтингы» проектын гамәлгә ашыра башлыйбыз. Казанда, Яр Чаллыда, Түбән Камада, Әлмәттә, Алабугада һәм Баулыда Президент премияләре лауреатлары инде бар», - диде ТР Иҗтимагый палатасы рәисе Зилә Вәлиева.
Бәйгедә бер проект белән генә катнашып булмавына ишарәләделәр, бу еллар дәвамында системалы эш булырга тиеш. «Бу эш тәҗрибәсенә ихтыяҗ булган һәм хакимият органнары тарафыннан хупланган, муниципаль берәмлектә билгеле оешма булырга тиеш», - диде Зилә Вәлиева. Ул быелгы конкурс тагын да кызыклырак исемнәр ачуына, конкурсның географиясен киңәйтүенә ышанычын белдерде.
Иҗтимагый палата рәисе әйтүенчә, республикада 6,5 меңгә якын иҗтимагый коммерцияле булмаган оешма бар, шуларның 2,5 меңе – Казанда. Ул коммерцияле булмаган сектор социаль сәясәтнең үзәгендә булуын ассызыклады. Бу сәламәтләндерү, спорт, белем бирү, патриотик тәрбия, милләтара татулык юнәлешендәге оешмалар булырга мөмкин.
Фото: © Гөлнар Гарифуллина
Бәйге 26 августтан 29 сентябрьгә кадәр уздырыла. Премиягә башкарма хакимият органнары каршындагы иҗтимагый советлар, шәһәр-районнарның иҗтимагый советлары, коммерцияле булмаган сектор дәгъва кыла ала. Зилә Вәлиева бәйгедә актив катнашырга өндәде. «Кемдер сузып йөреп, соңгы моментта гына исенә төшә. Кемдер әле ул премиягә үсеп җитмәдек, ди, төрлечә әйтүчеләр бар, ләкин чыннан да планка югары», - диде.
Зилә Вәлиева ел саен сигез премия бирелүен әйтте – 250 мең сум күләмендәге өч персональ премия һәм 400 мең сум күләмендә оешмаларга каралган биш премия. Теләге булганнарга Батурин, 7 А адресы буенча Иҗтимагый палатага документларны 29 сентябрьдән дә соңармый тапшыру зарур.
Узган елгы лауреатлардан бүген «Ярдәм» хәйрия фонды президенты Илһам Исмәгыйлев, лейкемия белән авыручы балаларга ярдәм буенча Анжела Вавилова исемендәге Республика хәйрия фонды идарәсе рәисе Владимир Вавилов, Алабуга дәүләт тарихи-архитектура һәм сәнгать музей-тыюлыгы директоры Гөлзада Руденко, «Ак Барс Созидание» хәйрия фонды директоры Әлфия Вәлиева, «Татарстанда ятим балаларны тәрбиягә алучы гаиләләр» оешмасы җитәкчесе Светлана Елакова һәм башкалар катнашты.
Дәүләт Советы депутаты Владимир Вавилов үзе өчен социаль юнәлешне эшнең әһәмиятен әйтте. «Безнең эш балаларның һәм олыларның авыр тормыш этаплары белән бәйле. Без проводниклар кебек – бик авыр, үлем хәлендәге пациентларны бу тормыштан икенчесенә озатабыз. Яшәрләренә инде бик аз калган кешеләрнең соңгы көннәре күңеллерәк узсын дип, күңелләрен күтәрергә тырышабыз», - диде.
Ул балаларның хыялларын тормышка ашырып, аларны катерда, самолетта йөрткәннәрен, хәтта юлбарыс баласын да алып килгәннәрен искә төшерде. Бер баланың юлбарысны сыйпап карау теләге булган. Ә күптән түгел Әлмәттән ун яшьлек авыру малайның хзыялын тормышка ашырганнар – һава шарында йөрткәннәр.
«Ул чакта баланың ничек сөенгәнен күрсәгез... Хәзер ул авыр хәлдә реанимациядә», - диде Владимир Вавилов.