Зөя монастырен торгызуга 25 ел тулу уңаеннан Шәймиев истәлекләре язылган китап чыкты
Шушы көннәрдә Татарстанда Зөя монастырен торгызуга 25 ел тулуга багышланган китап дөнья күрде. Анда бинаны торгызуда катнашкан 25 кешенең шәхси тарихы язылган. Китапта шулай ук монастырьдә торган беренче кешеләр һәм руханилар, шулай ук Татарстанның беренче Президенты Минтимер Шәймиев истәлекләре дә бар. Бу турыда Зөя монастыре җирле идарә башлыгы игумен Симеон сөйләде.
25 хикәянең һәрберсе монастырьнең яңарыш елларына багышланган бай фотоматериаллар, архив материаллары белән баетылган, дип билгеләп үтте игумен. «Бу формаль булмаган китап, ул яңарыш эше турында гына түгел, ә кешеләр тормышы турында да. Һәм өстәвенә, без беренче яшәүчеләрнең истәлекләрен, монастырьның беренче һәм икенче настоятеле, Минтимер Шәймиевнең истәлекләрен җыйдык, ул үзенең Зөяне яңадан торгызу идеясен ничек гамәлгә ашыруы турындагы хатирәләрен җиткерде», – дип сөйләде ул «Татарстан 24» телеканалына биргән интервьюсында.
Уникаль фрескаларны торгызу һәм монастырь бинасын төзекләндерү турында сөйләгәндә, игумен билгеләп үткәнчә, хәзер бу бурыч Шәймиев инициативасы буенча булдырылган «Яңарыш» фонды ярдәмендә «арттырып үтәлгән». «Без хәзер бинаның каралган кыяфәтен генә түгел, ә искиткеч, яңарган борынгы монастырьны күрәбез, ул бөтен илдән күп кешеләрне җәлеп итә, чөнки бу, чыннан да, Татарстанның һәм бөтен Россиянең энҗесе», – диде ул.