Новосибирск шәһәрендә Себер татар яшьләре фестиваленең гала-концерты була
18 сентябрьдә Новосибирск шәһәрендә Татар мәдәнияте йортында Россия халыкларының мәдәни мирасы елына багышланган гала-концерт булачак. Тамаша 15.00 сәгатьтә башлана. Керү бушлай. Бу хакта Бөтендөнья татар конгрессы сайты хәбәр итә.
Концертта себер татар яшьләре фестивалендә катнашучылар, Новосибирск төбәге, Себер шәһәрләре, Казахстан һәм Татарстан Республикалары коллективлары һәм солистлары чыгыш ясаячак. Шулай ук «Айнур» татар бию ансамбле (Томск шәһәре), ТРның атказанган сәнгать эшлеклесе Габделхак Ахунҗанов (Семей шәһәре, Казахстан Республикасы) һәм башкалар катнашачак.
Концерт алдыннан бөтенроссия яшьләр акциясе «Чәк-чәк пати» була. Биредә бөтен кунакларны чәк-чәк белән сыйлыйчаклар. Чарада татар милли ашлары һәм кулдан ясалган бизәнү әйберләре сатылачак.