Чаллы мәчетләре мобилизацияләнүчеләргә гуманитар ярдәм күрсәтүдә катнаша
Чаллы мәчетләре мобилизацияләнүчеләргә гуманитар ярдәм күрсәтү йөзеннән оештырылучы хәйрия чараларына кушылды. Шәһәрнең барлык иман йортларында да матди ярдәм күрсәтергә теләүчеләр өчен махсус тартмачыклар куелды. Алар аша җыелган сумманы хәрби хәрәкәттә катнашучыларга кирәк-яраклар алу өчен сарыф итәчәкләр.
Яр Чаллы мөхтәсибе урнабасары Илдар хәзрәт Зияров белдерүенчә, шәһәрдәшләр арасында акчалата гына түгел, ә кием-салым белән ярдәм итүчеләр дә бар. «Күптән түгел бер кардәшебез солдатларыбызга җибәрү өчен 100 пар оек алып килде. Бу турыда «Шәһри Чаллы» хәбәр итә.
Моннан тыш хәләл азык төлек белән дә, нигездә бу ит консервалары, ярдәм күрсәтүчеләр булды. Аларның барысын да без җыеп, атнага бер тапкыр тиешле урыннарга тапшырабыз. Алар үз чиратында мобилизацияләнүче шәһәрдәшләргә илтеп җиткерә», - дип белдерде хәзрәт.
Моннан тыш, дин әһелләре хәрби хәрәкәттә катнашучыларга догалар җыентыгы да җибәргән. Бу атнаның пәнҗешәмбесендә әлеге хәйрия эшләренә ТР «Хәят» мөслимәләр җәмгыятенең Чаллы филиалы да кушылырга уйлый. Берләшмә рәисе Римма Исхакова сүзләренчә, алар шәһәр мәчетләренең Якшәмбе мәктәбенә йөрүче ханымнар белән солдатларга җылы оекбашлар бәйли башлаячак.
«Безнең моның өчен барлык кирәк яракларыбыз да бар. Шул ук хәйриячеләр ярдәме белән энәләр, җепләр дә алып куйдык. 3 ноябрьдә Чаллының «Сөембикә» мәчетенә укырга йөрүче апалар белән очрашып, әлеге изге эшкә тотынырга исәп тотабыз», - диде Римма ханым.