Фәнзилә Җәүһәрова: Фольклор экспедициясенә йөргән бердәнбер бию белгече – Дәүләт Умеров
«Аның бердәнбер генә булуы бүгенге фән үсеше өчен кызганыч күренеш, шул ук вакытта горурлык та», - диде ул.
Татарстанның баш фольклорчысы, филология фәннәре кандидаты, «Татар ядкәрләре» шәхси оешмасы директоры Фәнзилә Җәүһәрова әйтүенчә, экспедицияләргә йөргән, татарлар яшәгән төрле этник төркемнәр урнашкан җирләргә барган бердәнбер бию белгече – Дәүләт Умеров.
«Аның бердәнбер генә булуы бүгенге фән үсеше өчен кызганыч күренеш, шул ук вакытта горурлык та. Ул халык биюләрен өйрәнде, биючеләребезне видеога төшереп, язмача теркәп барды», - диде ул Кариев театрында «ӘйдәБас» проекты кысаларында узган мастер-класста.
Аның фикеренчә, Дәүләт Умеров кебек белгечләрне татар фольклор үзәгендә әзерләп булыр иде. «Әлеге үзәкне 2011 елда яптылар. Без белгечләрне әзерләү буенча бердәнбер үзәк идек. Белгечләрне 15-20 ел дәвамында әзерләдек, алар бармак белән генә санарлык. Дәүләт Умеровны да без 2006 елда Әстерханнан Казанга җәлеп иттек, аңа эшләргә шартлар тудырдык», - дип искәртте ул.
«Дәүләт Умеров бию элементларын нотага салып яза ала. Без бүгенге көндә бу өлкәдә бердәнбер белгече булган бердәнбер халык. Хәзер андый белгечләрне әзерләү эше алып барылмый», - дип чаң сукты ул.
Культурология кандидаты, этнохореолог Дәүләт Умеров
Фото: © Михаил Захаров