Татарстанда пилотсыз очкычлар җитештерүне үстерү буенча комиссия составы тулыландырылды
Татарстанда «Пилотсыз авиация системалары» илкүләм проектын гамәлгә ашыру буенча Хөкүмәт ведомствоара комиссиясен киңәйттеләр. Республика Премьер-министры Алексей Песошин шул хактагы боерыкны имзалады.
Комиссия составына «Алабуга» махсус икътисади зонасының корпоратив мәсьәләләр буенча генераль директор урынбасары Артем Снитко һәм Лаеш икътисад техникумы директоры Эльвир Якупов кертелде.
Искәртеп узабыз, комиссия быелның октябрендә оештырылды. Татарстан Премьер-министры – комиссия рәисе, ТР сәнәгать һәм сәүдә министры Олег Коробченко һәм Иннополиска кураторлык итүче ТР вице-премьеры Роман Шәйхетдинов аның урынбасарлары итеп билгеләнде.
2023 елның августында төбәкнең пилотсыз очу аппаратлары фәнни-җитештерү үзәген оештыруга заявка бирү билгеле булды. Соңрак Россия Президенты Владимир Путин Татарстанның үз коптер-паркы барлыкка киләчәгенә ышаныч белдерде.