Новости за 29.04.2024

"Интертат"та журналист Энҗе Габдуллина ның мәетләрне яруга кагылышлы язмасы чыккан иде. Анда Татарстан Сәламәтлек саклау министрлыгы һәм Диния нәзарәте тәнкыйть ителгән иде.

Театр һәм кино актерлары Энҗе Сәйфетдинова һәм Фәрхәт Мөхәммәтҗанов өйләнешкән. Яшьләр никах туе уздырганнар. Әлеге яңалыкны Энҗе белән Фәрхәт социаль челтәрдәге сәхифәләре аша хәбәр итте. «Очраштык та киттек дөнья буйлап», – дип яза алар, тантанадан фото-видеолар куеп.

Галиәсгар Камал исемендәге театр актеры Эмиль Талипов гаиләсе кайгы кичерә. Артистның әтисе вафат булган.

Россиядә алкоголь сатуны, СССР үрнәге буенча, 11:00 – 19:00 сәгатьләр аралыгы белән чикләргә кирәк, дип тәкъдим итте җәмәгать эшлеклесе Владимир Михайлов. Бу – халыкның спиртлы эчемлекләр куллануын киметергә ярдәм итәчәк, дигән ул. Бу хакта «360.ru» басмасына сылтама белән «Газета.Ру» сайты яза.

Башкортстанның Иглин районында авариядә 6 кеше, шул исәптән балигъ булмаган балалар имгәнгән. Бу турыда «Башинформ» хәбәр итте.

Юморист, баянчы һәм мәҗлесләр алып баручы Фәрит Галиев социаль челтәрдәге сәхифәсендә башындагы көйгән чәчләрен күрсәтте.

Красноярск шәһәрендәге Октябрь күперендә авариядә имгәнгән малайны 20нче хастаханәгә салганнар. Бу турыда «Красноярск.Онлайн» үз чыганагына сылтама белән хәбәр итә. Белешмәне край буенча Сәламәтлек саклау министрлыгында раслаганнар. Тик баланың хәле турында өстәмә белешмә әйтмәгәннәр.

Вакытсыз арабыздан киткән моңлы җырчыбыз Эльмира Сөләйманованың әнисе Фидания ханым Кашапова белән беренче аралашу.

Вафат булган кешеләр өчен Коръән уку турында «Татарча хәдисләр» телеграм-каналында аңлаталар.

Уфада яшәүче ир-атның касыгына үскән гигант шешне алганнар. Бу хакта «Mash Batash» Телеграм-каналына сылтама белән «Московский комсомолец» сайты яза.

Бала хәсрәте килмәсен, дип еш ишетергә туры килә. Ни кызганыч, быелгы май бәйрәмнәре чыгышы белән Минзәләдән булып, Чаллыда яшәүче 3 гаиләнең иңнәренә әнә шул иң зур хәсрәтне сала. Бүген Минзәләнең Түбән Тәкермән авылында машина бәрдергән 3 баланы җирлиләр.

Красноярск краенда балалар бакчасында бәхетсезлек очрагы нәтиҗәсендә 3 яшьлек бала һәлак булган.

30 апрельдә Татарстанда аязучан-болытлы һава торышы була. Урыны белән бераз яңгыр явачак. Төньяк-көнчыгыштан, көнбатыштан, төньяк-көнбатыштан 14 метрга кадәр көчле җил. Төнлә һава температурасы +3..+8˚, көньяк һәм көнчыгыш районнарда урыны белән 0..+3˚ градус, -1˚ градуска кадәр кырау төшәчәк. Көндез +15..+20˚ градус.

Әтисе гаиләдән киткәндә, Зөлфиягә 8 яшь иде. Әнисе бернәрсә әйтмәде, аңлатмады. Бәлки, кирәк тапмагандыр, бәлки, сүзләр таба алмагандыр. Бары тик кызын кочып: «Мин беренчесе дә, соңгысы да түгел», – дип, бер генә җөмлә әйтте.

Мәдәният министрлыгы туристик маршрутлар ача. Максат – мәгърифәтчелек һәм стереотипларны җимерү. Журналистыбыз тест режимында үткәрелгән туристик маршрутта йөреп кайтты.

«Татарстан – Яңа гасыр» телеканалының социаль челтәрдәге «Ә син?» тапшыруында Лилия Хәйруллина кунак булды. Ул яңа гына Аргентинаның башкаласы Буэнос-Айреста дүртенче баласын табып кайтты. Җырчы анда 4 ай яшәгән, туган көнен дә шунда билгеләп үткән. Миләүшә һәм Данир Сабировлар аңа Аргентинага кадәр чәчәк «җибәргән».

Кичә, 28 апрельдә, 20.00 сәгать тирәсендә Югары Тәкермән һәм Түбән (Тауасты) Тәкермән авыллары арасында автоһәлакәт булды. Ике юл арасындагы дамбадан барган 4 малайны «Тойота Камри»да барган хатын-кыз бәрдереп үтерә. Соңрак малайларның барлыгы 5 булганлыгы, икесенә зыян килмәве турында хәбәр чыкты. Үлгән малайларга 8, 13, 17 яшь булган.

«Хозур» нәшрият йорты «Дин вә мәгыйшәт» редакциясе «Дин турында. Сезнең сорауларга җавап» телеграм-каналында зиратка бару белән бәйле кайбер мәсьәләләргә аңлатма бирә.

«Бер тапкыр укып чыккач, күңелгә кереп калды бу шигырь. Ә бит чыннан да дөрес сүзләр. Кешелек дөньясы әллә нишләде... Якын кешеләребезнең кадерләрен белсәк иде», – дип яза шигырь укучы яшь җырчы Нәфис Гыйниятов.

Татар блогеры – дальнобойщик Назим Галимов – социаль челтәрдәге сәхифәсендә көйдермичә генә шашлык пешерергә өйрәткән. Ул шашлык пешерә торган җайланмага фольга җәйгән, аннары, итне тезгәч тә, өстенә дә шуны ук ябып куйган.

Кырымның Евпатория шәһәрендә яшәүче 23 яшьлек кыз мәетен урманда тапканнар. Аны үтерүдә 2 ир-ат шикләнелә. Бу турыда «Комсомольская правда» хәбәр итте.

Илсөя Бәдретдинованы яратучы тамашачы арасында кечкенә малайлар да шактый. Җырчы аларның сәхнәгә менеп бүләк тапшырган, аны «пәп» иткән видеолар белән еш уртаклаша.

Бүген легендар «Айфара» төркеме артистлары котлаулар кабул итә. «Айфара»ның алыштыргысыз солисты Алмаз Шәрифуллин һәм музыкантлар Рәшит Максутов, Фәнис Мортазин, Алмаз Мөхәммәтҗановлар «Татарстанның атказанган артисты» дигән мактаулы исемнәргә лаек булган. Бүләкләрне «Айфара»ның филармония залында узган юбилей концертында Татарстан Республикасының мәдәният министры урынбасары Ленар Хәкимҗанов тапшырган. Бу хакта «Интертат»ка концертны тамаша кылган журналист Алсу Исмәгыйлева хәбәр итте.

Май бәйрәмнәрендә табигать кочагына ял итәргә чыгар алдыннан, артык мәшәкатьләнми генә, төрле эчлекле рулетлар һәм кабымлыклар ясарга була. Табын матур һәм мул булачак.