Новости за 05.05.2024

«Әгерҗе хәбәрләре» газетасы редакциясе баш мөхәррире Дания Абзалиева «Минем Герой – минем гаиләм» акциясенә кушылды. Бу хакта http://agryz-rt.ru/ сайтында хәбәр ителә.

6 майда Алабугада «Алабуга нуры» һәм «Новая Кама» газеталары призларына җиңел атлетика эстафетасы узачак. Йөгереш Таҗи Гыйззәт урамындагы Үзәк стадионда үткәрелә. Ярышлар 14.00 сәгатьтә башлана. Бу хакта «Алабуга нуры» хәбәр итә.

Менделеевск районы Бәзәкә авылында яшәүче Зәйнак Әһлиев 97 яшьлеген билгеләп үтте. Ул Бөек Ватан сугышында катнашкан. Ветеранны беренчеләрдән булып район башлыгы Радмир Беляев котлады, ул аңа нык сәламәтлек, якыннарының ярдәмен һәм тирә-юньдәгеләргә хөрмәтен тоеп яшәвен теләде.

Бүген Мәскәүдә Марьино районында хезмәт бурычын үтәгәндә һәлак булган журналистлар истәлегенә багышланган тантаналы чара узды. Бу хакта «Татмедиа» Матбугат һәм массакүләм коммуникацияләр республика агентлыгының Мәскәү шәһәрендәге вәкиле Динә Газалиева хәбәр итте.

Алдагы көннәрдә Татарстан территориясендә җил көчәю көтелә. Бу хакта Татарстан Гидрометеорология һәм әйләнә-тирә мохитне күзәтү үзәге кисәтә.

4 майда Татарстанда «Хәтер бакчасы» акциясе кысаларында республика халкы 1,5 млн агач утырткан. Бу хакта Татарстан Урман хуҗалыгы министрлыгының матбугат хезмәте хәбәр итә.

Бөек Ватан сугышында Җиңүнең 79 еллыгы алдыннан Татарстан Дәүләт Советы депутаты Римма Ратникова «Татар-информ»га фронтта булган бабайларының батырлыклары турында сөйләде.

6 майдан 12 майга кадәр Россия Президенты Владимир Путинның графигында берничә зур вакыйга көтелә. Аның бер атналык планы белән журналист Павел Зарубин уртаклашты.

Киләсе атнада Үзәк Россиядә аномаль түбән температура, төнлә кырау төшүе, бозлавык һәм кар көтелә. Бу хакта РИА Новости «Фобос» һава торышы үзәгенең әйдәп баручы белгече Евгений Тишковецка сылтама белән хәбәр итә.

Самараның «Бердәмлек» газетасында Данияр Сәйфиевнең «Бәйрәм файда белән узсын!» дигән язмасы чыкты.

«Минем Герой - минем гаиләм» патриотик флешмобка Татарстан Дәүләт Советының Экология, табигатьтән файдалану, агросәнәгать һәм азык-төлек сәясәте комитеты рәисе урынбасары Таһир Һадиев кушылды. Ул «Татар-информ»га Беренче бөтендөнья һәм Бөек Ватан сугышларында катнашкан бабасы һәм әтисе турында сөйләде.

2023 елда Татарстанда Бөек Ватан сугышы ветераны һәм инвалиды булган 21 кешегә техник тернәкләндерү чараларына һәм протез-ортопедия әйберләренә акча бүлеп бирелде. Үзләре сатып алган тернәкләндерү чаралары өчен компенсация рәвешендә 570 мең сумнан артык акча түләнгән, анда подгузник һәм махсус эчке кием чыгымнары да кергән.

Россия төбәкләрендә легаль (рәсми) булмаган эш белән тәэмин итүгә каршы көрәш буенча ведомствоара комиссия төзеләчәк. Хөкүмәтнең шул хактагы карарын Россия Премьер-министры Михаил Мишустин имзалады. Документ хокукый актларның рәсми порталында чыкты.

Майның беренче декадасында Россия төбәкләрендә көтелә торган һава торышы бу чорга түгел, ә апрель башына хас. Бу хакта Россия Гидрометеорология үзәгенең фәнни җитәкчесе Роман Вильфанд белдерде, дип хәбәр итә РБК.

22 июньдә Башкортстанның Чакмагыш районындагы татар телендә нәшер ителүче «Игенче» газетасының 27 ел дәвамында баш мөхәррире булган Хәйдәр Басыйровны искә алачаклар. Хәтер кичәсе каләм остасына 85 яшь тулуга һәм аның турында истәлекләр тупланган китап нәшер ителүгә багышланачак.

Казанда, Россиянең күпчелек зур шәһәрләрендәге кебек үк, яңа төзелешләрдә квадрат метрның уртача бәясе ташламалы ипотека гамәлгә куелганнан соң 2 тапкырга арткан. Әлеге программа 2020 елның язында эшли башлады. Бу хакта «Известия» яза.

Татарстанда бүген аязучан болытлы һава вәгъдә ителә, көндез урыны белән бераз яңгыр явачак. Бу турыда Татарстан Гидрометеорология һәм әйләнә-тирә мохитне күзәтү үзәге матбугат хезмәте хәбәр итә.

2019 елда армиядә үзенең 8 хезмәттәшен үтергән Рамил Шәмсетдинов, янәсе махсус хәрби операция зонасында массакүләм үтерү башкарган дигән хәбәр Интернетта барлыкка килде. Әлеге мәгълүматлар чынбарлыкка туры килми һәм фейк булып тора. Бу хакта Шәмсетдиновның адвокаты Руслан Нагиев хәбәр итте.

Башкортстанның «Рәйхан» клубы активистларының зур делегациясе Чувашиядә мөселманнар өчен истәлекле урыннар белән танышты. Бу хакта Россия мөселманнары Дини җыены матбугат хезмәте хәбәр итә.

Татарстан Рәисе Рөстәм Миңнеханов Гвинея-Бисау Президенты Умар Сисоку Эмбалоны майда Россиягә сәфәре вакытында безнең республикага эш сәфәре белән килергә чакырды. Африка лидеры Кызыл мәйданда Җиңү парадында булырга планлаштыра.

Россия Президенты Владимир Путин православие христианнарын һәм Россия халкын Пасха, Христосның яңадан туу бәйрәме белән котлады.

Татарстан Рәисе Рөстәм Миңнеханов Телеграм-каналында һәм «ВКонтакте» социаль челтәрендәге сәхифәсенә язылучы православларны Христосның яңадан тууы бәйрәме белән котлады.

Казанда Татарстанның төп Пасха гыйбадәтен Казан һәм Татарстан Митрополиты Кирилл җитәкләде. Дини литургия узган төндә Казанда Богородица ирләр монастыреның Изге Ана иконасы соборында узды.

Татарстан Республикасы Рәисе Рөстәм Миңнеханов Гвинея-Бисау Президенты Амару Сисоку Эмбало белән очрашты. Очрашу кичә Гамбиядә ИХОның XV саммиты кырларында узды. Бу турыда республика җитәкчесенең матбугат хезмәте хәбәр итте.

Пасха бәйрәме уңаеннан Татарстан Республикасы Рәисе Рөстәм Миңнеханов республика халкын котлады.