Илшат Әминов: Мин дә блогерлык эше белән шөгыльләнә башладым

Татарстан Журналистлар берлеге рәисе, «Яңа Гасыр» телерадиокомпаниясе генераль директоры, Татарстан Республикасы Дәүләт Советы депутаты Илшат Әминов «Татмедиа»да Татарстан Журналистлар берлегенең ХXI съездында журналистлар эшенә заманча технологияләрнең һәм тенденцияләрнең йогынтысын анализлады.

«Төгәл бүленеш барлыгын онытмаска кирәк. Әгәр дә кеше күңел ачу контентын төшерә икән, бу очракта аны аш-су остасы, чәчтараш яки туй оештыручы башкарган һөнәр ияләре белән чагыштырып була. Алар кешеләрнең күңел ачу, туклану, ял итү ихтыяҗларын канәгатьләндерә һәм, хезмәтләре сорауга карап бәяләнә. Әгәр блогер социаль яктан әһәмиятле, җәмгыять өчен мөһим мәгълүмат тарата икән, ул журналист функциясен үти. Бу очракта блогерлык мәгълүматны тарату платформасы гына була», - диде Илшат Әминов.

Ул блогерлык белән шөгыльләнүен, Телеграм-канал алып баруын әйтте. «Шуны әйтәсем килә: бер сәгатьлек мәгълүмати-аналитик программа язуга караганда бер ярым минутлык текстны язу кайвакыт катлаулы да әле. Илдә үз һөнәреңә тугры булып хезмәт итү шартлары, ирек дәрәҗәсе һәм сәяси хәл үзгәреп тора, әмма журналист һөнәренең асылы кала бирә», - диде Татарстан Журналистлар берлеге рәисе.

«Шуңа күрә мин әле дә үз һөнәремә тугры. Каршы фикердә булучылар медиатехнология, SMM-белгеч, PR-белгеч һ.б. белгечләр төп урынны алып тора, әмма журналист һөнәре бүген актуальлеген югалта, дип үз-үзләрен ышандыра. Әлбәттә, хәзерге заманда бу белгечләр дә кирәк. Әмма, мине дөрес сүзем өчен гафу итсеннәр, SMM-белгеч, PR-белгечләр – хезмәт күрсәтүче персонал гына. Яңа белемнәрне барлыкка китерүче, журналист булганда технологияләр дә яхшы була», - диде ул.