ЕЧЛ 1/8 финал дастлабки баҳсда ПСЖга учралган мағлубиятдан кейин “Реал” устози Карло Анчелотти ўз фикрлари билан ўртоқлашди. “Яхши ўйин ўтказа олмадик, аммо бу тўқнашувимизнинг биринчи қисми. Ўз майдонимизда бошқача ҳаракат қиламиз. Тўпни олдинга етказишда муаммолар кузатилди, узатмаларда кўп хатога йўл қўйдик, прессингдан чиқа олмадик. Рақиб яхши ўйнади, биз эса қийинчиликларга дуч келдик. 2-ўйинда ҳисобда ортда қолаётганимиз учун бироз кўпроқ босим ўтказишимиз талаб қилинади. Шунингдек, тўп билан аниқроқ ишлаш керак бўлади. Мбаппе айни вақти Европанинг энг яхши футболчиси. У ўйин натижасини ҳал қилди. Каземиро ва Менди дисквалификация туфайли жавоб баҳсида қатнаша олишмайди ҳамда уларнинг ўрнини тўлдирамиз. Бироқ, мен учун иккала карточка ҳам бироз ортиқчадек туюлди, Орсато (ҳакам)га шуни тушунтирдим”, дейди италиялик мутахассис.
