Новости за 05.10.2018

Соьлж-ГIала йиллина 200 шо кхачар даздеш ду Нохчийчохь. Цунна хьажийна цхьамогIа мероприятеш хилла Соьлж-ГIалахь а, республикерчу кхечу гIаланашкахь а, ярташкахь а. Соьлж-ГIалин де дазда республике баьхкина бу Оьрсийчуьра а, махкал арахьара а хьеший.

Ахь муха декъалвийр вара Кадыров Рамзан винчу денца?

Соьлж-ГIала йиллина 200 шо кхачар даздеш цхьана хеннахь 200 керла доьзал кхоьллина Нохчийчохь.  И доккха ловзар хилла Соьлж-ГIаларчу Зезагийн паркехь, хаам бо "Чечня сегодня" сайто. Цигахь дIахIиттийна яра даарш тIехь долу стоьлаш. Оьшуш йолу церемони дIайирзинчул тIаьхьа ловзар хилира, локхуш подар а, тухуш вата а йолуш, халхар деш хьеший а болуш.

Маршо Радион таханлера боцца хаамаш

Школехь болх атта бацахь а, алапа лахара делахь а, кIезиг бац царлахь шаьш къастийначу некъах бакхийбийраш. Царех цхьаь билгалвелира Маршо Радиона Хьехархочун Дийнахь.

Бохам хилла Соьлж-ГIалара Горагорске боьдучу некъа тIехь. Жимачу машенна урхалла деш хиллачу стага гIалат а далийтина некъахяьлла 5 адам чохь долу машен. Иза тIекъелялар бахьана долуш йийна 44 шо долу зуда. Кхин а цхьа зуда а, кхиъна йогIу ши йоI а, ша машенлелорхо а дIакхачийна Соьлж-ГIаларчу клинике.

ГIалгIайчоьнан Халкъан гуламан депутаташна беш Iаткъам бу Нохчийчоьнца административан доза хIоттош барт барца боьзна. Цунах лаьцна дIахьедар дина ГIалгIайчоьнан куьйгалхочуьнан гIоьнчо Перехрист Артема, хаам бо РИА Новости агенталло. Магасера митинг вовшахтоьхначу наха доьхург ду депутаташ шайна тIе бахкар. "Депутаташна Iаткъам бора цара кхаж тасале кIира хьалха дуьйна. Оьшшучул ахча лора депутаташа шайн декхарш охьадахкахь, доьзалшкахула уьш кхеро гIертара, гергарчаьргахула. ХIинца а бу царна Iаткъам беш... Читать дальше...

МиГ-29 тIеман кема чудеана Подмосковьерчу Коломнехь. Пилоташ чулилхина кIелхьарбевлла. Кема охьадоьжна Дмитровское эвлана гергарчу хьунхахь. Иза чударан бахьана хууш дац. Иза къасто леррина комисси кхоьллина Iедалша.

Оьрсийчоьнан Федералан таIзарш кхочуш даран сервисан директоран когаметто Максименко Валерийс дIахьедар дина, Украинерчу режиссеро Сенцов Олега мацалла хьегар сацийна аьлла. Сенцов хIума ца кхоллуш сецира Стигалкъекъа-беттан 14-чу дийнахь. Цо доьхург дара Украинера политикан тутмакхаш Оьрсийчуьрчу набахташкара дIахецар. Сенцов эххаре а бертавалийра шайн лоьраша аьлла, хаам бина "Интерфаксе" Максименкос.

Екатеринбургехь стаг вийна аьлла, бехке веш волчу Хасаев Мовсаран гергарчара пикет дIаяьхьна Москох федералан талламан комитетана хьалха. Цара чIагIдарехь, Хасаевна дуьхьал кхоьллина бехктакхаман гIуллакх бух боцуш ду. И бахьана долуш Хасаевн гIуллакх таллар Москохарчу коьртачу апппарате дIадалар доьху акцин декъашхоша. Кху шеран Дечкен-баттахь, Устрада-гIала а баьхкина, меттигерчу ОБОП-н белхахошца цхьаьна лаьцна дIавигина Хасаев Мовсар. Цуьнан гергарчара а, беза-бевзачара а чагIдо, и жима стаг цкъа а Екатеринбургехь хилла вац бохуш.

Росгвардин куьйгалхочо Золотов Виктора официалан дIахьедар дина Москох ЦIен майданахь эккхийтар дан дагахь хилла стаг ша дIалацар хьокъехь. Ша иза дина бохучух шеко йолу нах Къилбаседа Кавказе кхайкхийна цо. Кхаарин дийнахь Москох полицино лаьцнера 41 шо долу Приморьера вахархо Шалай Дмитрий. И таг ЦIечу майдана вала гIоьртинера шен машенахь, амма полицино ша сацийча кхерамаш теснера цо, шен машена чохь йолу газан баллон оьккхуьйтур ю ша аьлла. Зорбанан гIирсаша яздарехь, цу стага доьхург дара... Читать дальше...

ГIалгIайчохь дIайоьдуш ю Нохчийчоьнца латтанаш хийцарна дуьхьал хьажийна акци, хаам бо Маршо Радион Оьрсийн сервисо. Иттаннаш бахархоша Магасехь буьйса яьккхина республикан парламентана хьалха. Меттигерчу бахархоша кхача а, йовха хIуманаш а еана цу нахана. Еарин сарахь ГIалгIайчоьнан куьйгалхочо Евкуров Юнус-Бека кхайкхам бира акцин декъашхоша, майдане баьхкина баккхийн нах а, бераш эций, дIасадовла аьлла. Хьалхо дуьхьалонан акци сацаяхьара аьлла, кхайкхам бинера Нохчийчоьнан куьйгалхочо Кадыров Рамзана.

Вевзаш волу Iамеркан боксёрр, 12-за дуьненан чемпион, Мейвезер Флойд веана Нохчийчу. Соьлж-ГIаларчу аэропортера вевзаш волу спортхо вахара Соьлж-ГIалин юккъе. Цунах лаьцна хаам бина республикан куьйгахочо Кадыров Рамзана. Цо дийцарехь, Мейвезер дуьххьара вогIуш вац Нохчийчу. РогIера иза Соьлж-ГIала кхачар дозна ду и гIала йиллина 20 шо кхачар даздарца.