Нохчийчоьнан вице-премьер кхалхарх хаамбина Кадыровн критикаша
Нохчийчочьнан вице-премьер, ийначу кепехь латархо, мехкан урхалхочун берийн хилла тренер Эдилов Iабдул-Керим велла. Цунах лаьцна хаамбина оппозицин 1АДАТ, NIYSO телеграм-каналаша.
NIYSO-н хаамашца, дахначу кIирнах дуьйна кхелхина ву 39 шо долу Эдилов. Мича бахьанашца хууш дац, амма къаьстина иза Нохчийчохь велла хилар.
Оцу юкъанна 1АДАТ-а хаамбина, Эдилов гIуран-беттан 29-чохь велла бохуш, нохчийн маттахь йоцца аудио зорбане йаьккхина цара, цу тIехь вевзаш воцчу стага, хетарехь, цуьнан юьртахо ву, боху Эдилов Iабдул-Керим велла, дIахIоттийна тезет ду.
Дукха хан йоццуш Эдилов дIавайнера информацин шортенера, тIечIагIбазчу хаамца, Iедалхойн таIзарехь хилла иза, Нохчийчоьнан куьйгалхочун "уллорчу гона" юкъара а дIаваьккхинера.
Чиллан-баттахь хIоттийнера Эдилов Iабддул-Керим Нохчийчоьнан вице-премьеран дарже. Цуьнгарчу жоьпаллин сфера ю аьлла билгалйаьккхинера кегийрхойн политика, спорт, бюджетан ахчанна тIехь контроль латтор а. Хьалхо Нохчийчоьнан урхалхочун секретариатан куьйгалхо вара иза.
Iабдул-Кериман ваша Эдилов Валид хIоттийра спортан министр мангал-баттахь. Iабдул-Керим а, Валид а вара Кадыров Рамзанан бераш лата Iамош.
2010-чу шарахь нохчийн латархо Эдилов UFC-н контракташна юкъараваьккхира: промоушенехь аьттонаш баха новкъарло йира цунна чевнаш йарна а, 2016-чу шеран юьххьехь допинг-тестах чекх ца валарна а. UFC юкъара Эдилов дIаваккхар Нохчийчохь бакъ ца дора, Кадыровца къамел хиллачул тIаьхьа ша юкъараваьлла бохура.
Эдилов Iабдул-Керим –Кадыров Рамзанан юьртахо вара: ший а ЦIоьнтрара ву (хIинца Ахмат-Юрт).
Маршо Радионо масийттазза йаздира, лаккхарчу даржашкахь Нохчийчохь Кадыров Рамзанан гергара нах а, юьртахой а хиларх.