ბრალი დაუმძიმდა გურიაში არასრულწლოვანის თვითმკვლელობამდე მიყვანაში დადანაშაულებულ პირს
ბრალი დაუმძიმდა ოზურგეთში დაკავებულ, 1996 წელს დაბადებულ პირს (მ.თ.), რომელიც 2002 წელს დაბადებული არასრულწლოვანი გოგონას (ნ.ბ.) თვითმკვლელობამდე მიყვანაში იყო ბრალდებული. მას ასევე დაემატა წინასწარი შეცნობით არასრულწლოვანის მიმართ ჩადენილი გარყვნილი ქმედების ბრალდება. გამოძიება მიმდინარეობს საქართველოს სსკ-ს 115-ე მუხლით და 141-ე მუხლის 1-ლი ნაწილით. დამტკიცების შემთხვევაში დანაშაული 7 წლამდე ითვალისწინებს თავისუფლების აღკვეთას.
"გამოძიებით დადგინდა, რომ ბრალდებულმა ოზურგეთის მუნიციპალიტეტის სოფელ ნატანებში მცხოვრები, 2002 წელს დაბადებული ნ.ბ. სოციალური ქსელის - „ფეისბუქის“ საშუალებით გაიცნო. მ.თ.-ს გოგონასთან გარკვეული დროის განმავლობაში, ამავე ქსელის მეშვეობით მიმოწერა ჰქონდა. მოგვიანებით, ბრალდებული ნ.ბ.-ს აღნიშნული მიმოწერის მისივე მშობლებისთვის გაგზავნით დაემუქრა, რის შედეგადაც არასრულწლოვანი გოგონა ინტიმური ხასიათის ფოტოსურათებისა და ვიდეოკადრების გადაღებასა და გაგზავნაზე დაითანხმა. მას შემდეგ, რაც ნ.ბ.-მ გადაღებული ფოტოები და ვიდეომასალა გადაუგზავნა, ბრალდებულმა გოგონას დაშანტაჟება დაიწყო, რის გამოც ამ უკანასკნელმა საკუთარი საცხოვრებელი სახლის ეზოში თავი ჩამოიხრჩო. დაკავებული ჩადენილ დანაშაულს აღიარებს" - იუწყება შსს.