პრაღაში გაიმართა ქართულ ინტერნაციონალური სამედიცინო და საზოგადოებრივი ჯანდაცვის ასოციაციის შეხვედრა
12 ოქტომბერს პრაღამ უმასპინძლა ქართულ ინტერნაციონალური სამედიცინო და საზოგადოებრივი ჯანდაცვის ასოციაციის (GIMPHA) რიგით მერვე სამუშაო შეხვედრას, რომელშიც მონაწილეობა მიიღეს ორგანიზაციის წევრებმა, საქართველოს ჯანდაცვის მინისტრმა, ეკატერინე ტიკარაძემ, საქართველოდან ჩამოსულმა სტუდენტებმა.
GIMPHA -ს დაარსდა 2012 წლის 27 ოქტომბერს, ამსტერდამში. ის აერთიანებს ევროპაში სხვადასხვა სპეციალობით მომუშავე ქართველ ექიმებს. ორგანიზაცია მიზნად ისახავს საქართველოში მედიცინის სფეროს განვითარების ხელშეწყობას.
12 ოქტომბრის სამუშაო შეხვედრის ორგანიზატორი იყო პრაღაში მომუშავე ექიმი, GIMPHA -ს წევრი ვანო ჩაჩხიანი. როგორც მან რადიო თავისუფლებას უთხრა, სხვა საკითხებთან ერთად შეხვედრაზე განიხილეს საქართველოში არსებული პრობლემები კარდიოქირურგიის, ინფექციების და ანტიბიოტიკების მოხმარების, ოჯახის ექიმის ინსტიტუტის, ზოგადი ქირურგიის, საგანმანათლებლო საკითხების თვალსაზრისით, შეაჯამეს ჩატარებული სამუშაო და დაგეგმეს სამომავლო პროგრამები.
სამუშაო შეხვედრების გარდა, ორგანიზაცია ყოველ წელს ატარებს საერთაშორისო კონგრესს. "მომავალი წლის საერთაშორისო კონგრესი კვლავ თბილისში ჩატარდება და ვიმედოვნებთ, რომ როგორც შარშან, მასში 800-მდე ქართველი ექიმი მიიღებს მონაწილეობას" - ამბობს ჩაჩხიანი.