ლუკა კურტანიძე მესამედ გახდა მსოფლიოს ჩემპიონი ვეტერანებს შორის
თბილისის სპორტის სასახლეში მიმდინარე მსოფლიოს ჩემპიონატზე ჭიდაობაში ვეტერანებს შორის, ბოლოსწინა - მეხუთე საჭიდაო დღე საქართველოს ჰიმნით დაგვირგვინდა. C დივიზიონში, რომელიც 46-დან 50 წლამდე ვეტერან სპორტსმენებს აერთიანებს, 130 კილოგრამი წონითი კატეგორიის მსოფლიო კონკურენცია ლუკა კურტანიძის ტრიუმფით დასრულდა. მსოფლიოს ორგზის და ევროპის ხუთგზის ჩემპიონმა ქართველმა მოჭიდავემ, ვეტერანებს შორის მესამედ შეძლო მსოფლიოს ჩემპიონის ტიტულის მოპოვება. ფინალში მან ნახევარ წუთში დაამარცხა მონღოლი მეტოქე ბაიანმუნხ შურა.
საქართველოს ნაკრებმა დღეს სამი მედალი მოიპოვა. სამივე C დივიზიონში. ლუკა კურტანიძის გარდა, კვარცხლბეკზე ავიდნენ ჯამბულ სანაკოშვილი (78 კგ) და გოჩა კირკიტაძე (62 კგ). სანაკოშვილმა მეორე საპრიზო ადგილი დაიკავა. კირკიტაძემ - მესამე.
მსოფლიოს 2019 წლის ჩემპიონატი 13 ოქტომბერს დასრულდება, 40 წლამდე ვეტერანთა შეჯიბრებით.