„ქვეყნის სამსახურში“: პირველი გაჩერება 20 ოქტომბერს კახეთი იქნება
მოძრაობა „ქვეყნის სამსახურში“ რეგიონებში გასვლას იწყებს. გამოქვეყნებული განცხადების თანახმად, პირველი გაჩერება კახეთია, ხოლო მიზანს ქვეყნის სამსახურში მეტი ადამიანის ჩართვა წარმოადგენს. პროცესი 20 ოქტომბერს თელავიდან დაიწყება.
„20 ოქტომბერს თელავს მოვუყვებით სამოქალაქო მოძრაობის მიზნებზე, არჩევნებზე წასვლის აუცილებლობაზე, მოვუსმენთ მათ პრობლემებს და გავაცნობთ ამა თუ იმ პრობლემის გადაჭრის გზებს. ერთად ერთის წინააღმდეგ!“, - აცხადებს მოძრაობა „ქვეყნის სამსახურში“.
განცხადებაში აღნიშნულია, რომ საჭიროა საზოგადოებამ სწორად გამოიყენოს პარლამენტში შენობის წინ 93 დღის განმავლობაში მიმდინარე აქციის მთავარი მონაპოვარი - 2020 წლის არჩევნების პროპორციული სისტემით ჩატარება.
„პარლამენტის წინ 93-დღიანი ბრძოლის მთავარი მონაპოვარი პროპორციული არჩევნებია. 2020 წელს, სწორედ ამ სისტემით ავირჩევთ პარლამენტს და სამოქალაქო საზოგადოების ეს დიდი გამარჯვება დაასრულებს ჩვენს ქვეყანაში ერთი პოლიტიკური პარტიის ან კონკრეტული პირების შეუზღუდავ ძალაუფლებას“.
მოძრაობის „ქვეყნის სამსახურში“ მიერ გამოქვეყნებულ განცხადებაში აღნიშნულია ასევე, რომ:
„20 ივნისს, საქართველოს მთავრობამ სიხარულით უმასპინძლა და პარლამენტის თავმჯდომარის სკამზე დასვა რუსი კომუნისტი დეპუტატი - სერგეი გავრილოვი. ოკუპანტის ეს პატივით დახვედრა იმავე დღეს ათასობით ადამიანმა გააპროტესტა.
მთავრობამ, რომელიც ოკუპანტს მშვიდობით ეგებება, თავისივე მშვიდობიან დემონსტრანტებს ცხოველებისთვის განკუთვნილი რეზინის ტყვიები დაუშინა.
„გავრილოვის ღამეს” დაშავდა 200-ზე მეტი ადამიანი, 40-მდე მედიის წარმომადგენელი და თვალი დაკარგა 5-მა ადამიანმა.
იმის ნაცვლად, რომ ხელისუფლებას მომხდარზე პასუხისმგებლობა აეღო, ბიძინა ივანიშვილმა დამნაშავე შს მინისტრი დააწინაურა და ახლა გიორგი გახარია პრემიერ-მინისტრის პოსტს იკავებს“.
მოძრაობის „ქვეყნის სამსახურში“ წარმომადგენლები პირველი შეხვედრის გამართვას თელავში, ერეკლე მეორის მოედანზე გეგმავენ.