სირიელი ქურთები: რუსეთის შუამავლობით მიღწეული შეთანხმება ემსახურება საზღვრის დაცვას

სირიელი ქურთების ლიდერები აცხადებენ, რომ მოსკოვის შუამავლობით პრეზიდენტ ბაშარ ალ-ასადის მთავრობასთან მიღწეული შეთანხმება ამ ეტაპზე კონცენტრირებულია საზღვრის გასწვრივ დისლოცირებულ სირიის არმიაზე და პოლიტიკურ საკითხებს ორი მხარე მოგვიანებით განიხილავს. 

წამყვანი ქურთი პოლიტიკოსის, ალდარ ხალილის თქმით, ასადის მთავარი მოკავშირის, რუსეთის მეთვალყურეობით შემუშავებული ეს "სასწრაფო ზომა" ემსახურება ჩრდილო-აღმოსავლეთ სირიაში თურქეთის შეტევის ბლოკირებას. 

აშშ-მა 13 ოქტომბერს განაცხადა, რომ ჩრდილო-აღმოსავლეთ სირიიდან გაიყვანს 1000 სამხედროს, თურქეთის მხრიდან შეტევის ფონზე. თურქეთმა თავისი ოპერაცია ერთი კვირის წინ დაიწყო, მანამდე აშშ-ის პრეზიდენტმა, დონალდ ტრამპმა მიიღო გადაწყვეტილება, სამხედროები გაეყვანა ჩრდილოეთ სირიის ორი სადგურიდან, სადაც ისინი წლების განმავლობაში იყვნენ დისლოცირებულნი. თურქეთი აცხადებს, რომ მისი ოპერაციის სამიზნეა ქურთთა დანაყოფები, რომლებსაც ის "ტერორისტებად" მიიჩნევს. 

"მას შემდეგ, რაც რეგიონი ამერიკელებმა მიატოვეს და თურქეთის შეტევას მწვანე შუქი აუნთეს, იძულებული ვიყავით, სხვა გზები განგვეხილა, მათ შორის მოლაპარაკება დამასკსა და მოსკოვთან, რათა გვეპოვა თურქეთის თავდასხმის შეჩერების საშუალება", - ამბობს კიდევ ერთი ქურთი პოლიტიკოსი, ბადრან ჯია კურდი. 

გაეროს შეფასებით, თურქეთის შეტევის გამო სახლ-კარი 130,000-მდე ადამიანმა დატოვა.