ცოტნე გამსახურდიას ადვოკატი: ეს არ იყო მხოლოდ ჩხუბი, ეს იყო მისი მკვლელობის მცდელობა
ცოტნე გამსახურდიას ოჯახის ადვოკატი ამირან გიგუაშვილი ამბობს, რომ მისი დაცვის ქვეშ მყოფის საქმეში მკვლელობის მცდელობის გარდა სხვა კვალიფიკაციაზე საუბარიც კი წარმოუდგენელია, მთავარი შეკითხვა კი არის ის, ერთმა პირმა ჩაიდინა დანაშაული თუ რამდენიმემ.
ადვოკატი ცოტნე გამსახურდიას ოჯახის წევრების მსგავსად, ეჭვქვეშ აყენებს გამოძიების ვერსიას, რომლის თანახმად, ცოტნე გამსახურდიას ჭრილობა მხოლოდ ერთმა კაცმა მიაყენა. ადვოკატი ამბობს, რომ ყველა მნიშვნელოვანი საგამოძიებო მოქმედება სწორად უნდა ჩატარდეს და გამოძიებამ დამაჯერებელი მტკიცებულებები უნდა წარადგინოს.
ამირან გიგუაშვილი აღნიშნავს, რომ თავდასხმაში სხვა პირის მონაწილეობის პირდაპირი ინფორმაცია დაცვის მხარეს არ აქვს, თუმცა აქვს ვერსიები გარდა იმისა, რომ ცოტნე გამსახურდია ფიზიკურად ძლიერია, გამოცდილია ექსტრემალურ სიტუაციაში და მისთვის ასეთი დაზიანებების მიყენება ერთ კაცს არ შეეძლო:
„მოვთხოვთ, წარმოადგინონ დამაჯერებელი მტკიცებულებები. ვიცით, რომ ცოტნე გამსახურდიას არ ჰქონდა ისეთი კონფლიქტი ან დაპირისპირება ვინმესთან, ვინც მას სასიკვდილოდ გაიმეტებდა. ეს არ იყო მხოლოდ ჩხუბი, ეს იყო მისი მკვლელობის მცდელობა, სხვა კვალიფიკაციაზე საუბარიც კი წარმოუდგენელია. აქ საუბარი შეიძლება იყოს იმაზე, ეს არის ჯგუფური დანაშაული თუ მხოლოდ ერთი პირი მონაწილეობდა. ყველაზე კარგი წყარო იქნება თავად ცოტნე, როდესაც გამოჯანმრთელდება“, - განაცხადა ადვოკატმა ამირან გიგუაშვილმა, რომელიც საქმის მასალებს ჯერ არ გასცნობია. იგი ამბობს, რომ ეს მას შემდეგ მოხდება, რაც დაკავებულებს ბრალს წაუყენებენ და ცოტნე გამსახურდიას დაზარალებულის სტატუსი მიენიჭება. მისივე თქმით, ოჯახი აპირებს მიმართოს სახალხო დამცველსაც, თავისი კომპეტენციის ფარგლებში ჩაერთოს საქმეში.
გამოძიების ვერსიით, 19 დეკემბერს, თბილისში, გალის ქუჩაზე, საკუთარი საცხოვრებელი სახლის მიმდებარე ტერიტორიაზე, ერთმა პირმა სიტყვიერი შეურაცხყოფის გამო მომხდარი შელაპარაკების ნიადაგზე, ბასრი საგნის გამოყენებით რამდენიმე ჭრილობა მიაყენა ცოტნე გამსახურდიას და შემთხვევის ადგილიდან მიიმალა.
შინაგან საქმეთა სამინისტრომ ცოტნე გამსახურდიას განზრახ მკვლელობის მცდელობის ბრალდებით ერთი პირი დააკავა. სხვა ოთხ დაკავებულს კი ბრალად ედება განსაკუთრებით მძიმე დანაშაულის შეუტყობინებლობა.
ცოტნე გამსახურდიას მკვლელობის მცდელობასა და დანაშაულის შეუტყობინებლობაში ბრალდებულ პირებს ოფიციალურად ბრალს დღეს, 21 დეკემბერს წაუყენებენ.