გაფრინდაშვილი: იქ ყველას ვეუბნებოდი, რომ ვიმყოფები საქართველოს ტერიტორიაზე
ვაჟა გაფრინდაშვილის თქმით, ოკუპირებულ ცხინვალის რეგიონში მისი ჩასვლის მთავარ მიზანს პაციენტის ნახვა წარმოადგენდა. ცხინვალის საოკუპაციო რეჟიმის საპატიმროდან 28 დეკემბერს გათავისუფლებულმა ექიმმა ამ შინაარსის განცხადება პრესკონფერენციაზე გააკეთა.
„მთავარი მიზეზი იყო ავადმყოფის ნახვა. სამწუხაროდ, მაპატიეთ, ვერ ვიტყვი გვარს და სად ცხოვრობდა იმიტომ, რომ შეექმნება ალბათ პრობლემა იმ ადამიანს... სანახავად (წავედი)... დახმარება, ალბათ, ნაკლებად შეიძლება ითქვას... მაგრამ რომ დამაკავეს რუსეთის სასაზღვრო ნაწილებმა, იქ უკვე ვუთხარი, რომ ეკლესიის ნახვა მინდოდა სოფელ მონასტერში“, - განცხადება ვაჟა გაფრინდაშვილმა პრესკონფერენციაზე.
მისი თქმით, შეწყალების თხოვნა 27 დეკემბერს ნამდვილად დაწერა, მაგრამ საოკუპაციო რეჟიმის მიერ წაყენებული ბრალი - საზღვრის უკანონო გადაკვეთა - მას არასოდეს უღიარებია.
„ჩემი პოზიცია იყო პირველი დღიდან და არც შემიცვლია, რომ - მე არ დამიტოვებია საქართველოს საზღვარი. საზღვრის გადაკვეთა ვიცი, როგორც ხდება - წელს დაახლოებით 7 ქვეყანაში მომიწია ყოფნა. რუსი მესაზღვრეები იქნებოდნენ თუ ცხინვალის „კაგებესა“ და მილიციის თანამშრომლები, ვეუბნებოდი, რომ მე საქართველოს ტერიტორია არ დამიტოვებია და მე ვიმყოფები რუსეთის მიერ ოკუპირებულ საქართველოს ტერიტორიაზე“, - განაცხადა ვაჟა გაფრინდაშვილმა.
მისი თქმით, მის წინააღმდეგ დაწესებული ხანგრძლივი საპატიმრო სასჯელი უკავშირდებოდა არა მის ქმედებას, არამედ - მის პოზიციას - „ჩემი აზრით, ჩემი დაკავება და წელიწადისა და ცხრა თვის მოსჯა იყო არა საქციელის გამო, არამედ იმის გამო - რასაც მე ვამბობდი“.
უსეთის საოკუპაციო ძალების მიერ 9 ნოემბერს დაკავებული ექიმი, ვაჟა გაფრინდაშვილი 28 დეკემბერს გაათავისუფლეს. სამხრეთ ოსეთის დე ფაქტო რესპუბლიკის ადგილობრივი მედიის ცნობით, ექიმი დე ფაქტო რესპუბლიკის პრეზიდენტმა, ანატოლი ბიბილოვმა შეიწყალა.
20 დეკემბერს, დე ფაქტო რესპუბლიკის „ლენინგორის რაიონის” (ახალგორი) სასამართლომ ვაჟა გაფრინდაშვილი რუსეთის სისხლის სამართლის კოდექსით გაასამართლა და ე.წ. საზღვრის დარღვევისთვის მიუსაჯა პატიმრობა ერთი წლითა და ცხრა თვით.
28 დეკემბერს, შიდა ქართლის პოლიციის დეპარტამენტის დატოვების შემდეგ, ექიმი გორიდან თბილისში ოჯახის წევრებთან ერთად დაბრუნდა. ის ავტომობილს თავად მართავდა. მანამდე, გაფრინდაშვილმა ჟურნალისტებს უთხრა, რომ თავს კარგად გრძნობს და გარკვეული დროის შემდეგ მათ ყველა შეკითხვას უპასუხებს.