გაფრინდაშვილი: შეწყალების წერილის ტექსტში ბრალის აღიარება არ არის
ვაჟა გაფრინდაშვილის თქმით, მან მართლაც დაწერა შეწყალების წერილი სამხრეთ ოსეთის დე ფაქტო რესპუბლიკის პრეზიდენტის, ანატოლი ბიბილოვის სახელზე; მაგრამ ეს მოხდა ბრალის აღიარების გარეშე, წერილის ტექსტი კი - შესაბამისი, ნეიტრალური ფორმულირებით შედგა.
ცხინვალის საოკუპაციო რეჟიმის საპატიმროდან 28 დეკემბერს გათავისუფლებულმა ექიმმა ამ შინაარსის განცხადება 20:00 საათზე გამართულ პრესკონფერენციაზე გააკეთა. ჟურნალისტების წინაშე ის მეუღლესთან, თამილა ლაფანაშვილთან ერთად წარსდგა.
„მე მაქვს იმის (შეწყალების წერილის) კოპიო... როცა შეწყალებაზე იყო ლაპარაკი, ვინც შემომთავაზა, იმას ვუთხარი, რომ, რადგან ბრალდებას არ ვაღიარებ... როგორც ჩემთვის ცნობილია, შეწყალება რომ გაგიკეთონ, ბრალდება უნდა აღიარო... თვითონ შემომთავაზა, მოდი, ისე დავწეროთ, სადაც არ ჩანს, რომ თქვენ აღიარებთ ამ საზღვრის დარღვევას... იმ წერილში მიწერია, რომ მე დამაკავეს... ტერიტორიაზე რუსებმა, მომისაჯეს ამდენი და გთხოვთ გამათავისუფლოთ... სად დამაკავეს, შემიძლია გითხრათ - სოფელი მონასტრის ორღობეში დამაკავეს“, - განაცხადა გაფრინდაშვილმა.
მისი განმარტებით, შეწყალების წერილმა შედეგი 12 საათში გამოიღო: 27 დეკემბერს საღამოს დაწერა; ხოლო 28 დეკემბერს, 09:25 საათზე შეატყობინეს, რომ გათავისუფლებას უპირებდნენ.
ამავე პრესკონფერენციაზე ვაჟა გაფრინდაშვილმა განაცხადა, რომ პოზიცია არცერთი წუთით არ შეუცვლია და დაკავებული ყველას უმეორებდა, რომ იმყოფებოდა რუსეთის მიერ ოკუპირებულ საქართველოს ტერიტორიაზე.
ოკუპირებული ცხინვალის ადგილობრივი მედია 28 დეკემბერს წერდა, რომ საზღვრის კვეთის ბრალდებით დაკავებულმა ექიმმა, ვაჟა გაფრინდაშვილმა შეწყალების თხოვნით მიმართა ანატოლი ბიბილოვს, „რაც წარმოადგენს ბრალის აღიარებისა და მონანიების დადასტურებას“.
რუსეთის საოკუპაციო ძალების მიერ 9 ნოემბერს დაკავებული ექიმი, ვაჟა გაფრინდაშვილი 28 დეკემბერს გაათავისუფლეს. სამხრეთ ოსეთის დე ფაქტო რესპუბლიკის ადგილობრივი მედიის ცნობით, ექიმი დე ფაქტო რესპუბლიკის პრეზიდენტმა, ანატოლი ბიბილოვმა შეიწყალა.
20 დეკემბერს, დე ფაქტო რესპუბლიკის „ლენინგორის რაიონის” (ახალგორი) სასამართლომ ვაჟა გაფრინდაშვილი რუსეთის სისხლის სამართლის კოდექსით გაასამართლა და ე.წ. საზღვრის დარღვევისთვის მიუსაჯა პატიმრობა ერთი წლითა და ცხრა თვით.
28 დეკემბერს, შიდა ქართლის პოლიციის დეპარტამენტის დატოვების შემდეგ, ექიმი გორიდან თბილისში ოჯახის წევრებთან ერთად დაბრუნდა. ის ავტომობილს თავად მართავდა. მანამდე, გაფრინდაშვილმა ჟურნალისტებს უთხრა, რომ თავს კარგად გრძნობს და გარკვეული დროის შემდეგ მათ ყველა შეკითხვას უპასუხებს.