Белсенділер мен қорғаушы Жыланбаевтың үкімін "тапсырыс" деп санайды
5 желтоқсанда Астанада тіркелмеген "Алға, Қазақстан!" партиясының өкілдері мен адвокат баспасөз мәслихатын өткізіп, белсенді Марат Жыланбаевқа шыққан сот үкімімен келіспейтіндерін мәлімдеді. Олар "бұл – саяси үкім әрі тапсырыс" деді.
Тергеу Жыланбаевты белсенділер Бибігүл Иманғалиева мен Жанар Сәрсеноваға ақша аударғаны үшін айыптаған. Айыптау актісінде Иманғалиева мен Сәрсенова "экстремистік қозғалыстың қатысушылары" деп жазылған.
Белсенді Сергей Измайловтың айтуынша, Иманғалиева мен Сәрсенов бас прокуратураға хат жолдаған. Бұл хатқа Жыланбаевтың сотына қатысқан прокурор Саят Нұрбеков "Иманғалиева мен Сәрсенованың есімі экстремистік ұйымға қатысушылар тізімінен" табылмағанын айтып жауап берген.
Ал қорғаушылар "тергеу фактілерді бұрмалады, судья біржақты шешім шығарды әрі адвокаттардың тұжырымдарын ескермеді" деп санайды.
Баспасөз мәслихатына қатысқан тағы бір белсенді Әсет Әбішев Марат үшін кұресті жалғастыратынын айтты. Ол "қандай жағдай болмасын Марат "Алға, Қазақстанның" лидері әрі ұйымдастыру комитетінің мүшесі болып қала беретінін" мәлімдеді.
Қазір Жыланбаев тергеу изоляторының медициналық бөлімшесінде жатыр. Ол 16 күн аштықтан соң денсаулығы нашарлаған. Ал адвокат Мейіржан Досқараев "Жыланбаев соңына дейін күресетінін айтты" дейді.
Баспасөз мәслихатына белсенділерден бөлек Жыланбаевтың денсаулығына алаңдаған басқа да адамдар келген.
Марат Жыланбаев — белгілі супермарафоншы, "Алға, Қазақстан!" тіркелмеген оппозициялық партиясының лидері. 29 қарашада Астанада сот "тыйым салған ұйымның қызметіне араласты", "экстремистік ұйымды қаржыландырды" деп айыптап, 7 жылға соттаған.
Тергеу Жыланбаев шетелде тұратын оппозициялық саясаткер, билікті сынап жүрген Мұхтар Әблязовпен байланысқан деп есептейді. Жыланбаевтың жақтастары бұл істің саяси астары бар дейді. Қазақстандық құқық қорғаушылар марафоншыны "саяси тұтқындар" қатарына енгізген.
Адам құқықтары бойынша халықаралық серіктестік (IPHR) пен Қазақстандағы адам құқығы мен заңдылықтар бойынша халықаралық бюро Астананы белсенді Марат Жыланбаевты дереу қамаудан босатуға шақырған. Екі ұйымның біріккен мәлімдемесінде Жыланбаевқа шыққан үкім "Қазақстан билігінің демократиялық реформалар жасауға құлықсыз екенін көрсетті" деген.