Түркістан прокуратурасы "үш оқушыны суық бөлмеге оқшаулау" оқиғасын тексеруді бастады
Түркістан облысы Төле би ауданының прокуратурасы №4 арнайы мектеп-интернатында "үш оқушыны суық бөлмеге оқшаулап ұстау" дерегі бойынша тексеруді бастады. Бұл туралы Азаттыққа облыстық прокуратураның баспасөз қызметі хабарлады. Бұдан бұрын Түркістан облысындағы бала құқығы жөніндегі уәкіл Динара Егембердиева мектеп әкімшілігі үш оқушыны "қараңғы суық бөлмеге ұстағаны" жөнінде мәлімдеген еді.
Егембердиеваның айтуынша, мектеп-интернатында аз қамтылған отбасылардың балалары оқиды. Мектеп әкімшілігі жұқпалы аурумен ауырған үш оқушыны оқшаулап, жеке бөлмеге жатқызған. Бөлменің іші қараңғы, жылу жүргізілмеген, іші суық, едені бетон болған. Уәкіл бөлмеде су мен дәретхана да болмағанын айтады.
- Бала ауырғанда оны өзге оқушылардан оқшаулау қалыпты жағдай. Бірақ олардың өмір сүруіне жағдай жасалуы керек. Одан бөлек ауырып жатқан балаларды жалғыз қалдыруға болмайды. Олардың жағдайын жиі бақылайтын, ас-суын уақтылы беретін мұғалім бекіту керек. Мұның бәрі жасалмаған, ауырып жатқан балаларды суық, қараңғы бөлмеде қалдырған, - дейді уәкіл Азаттыққа.
Мектеп-интернатының әкімшілігі 15 қарашада желшешек ауруымен ауырған 8-сынып және 4-сыныпта оқитын үш оқушыны оқшаулағанын растайды. Бөлмеде су, дәретхана, жылу жоқ дегенмен келіспейді.
"Еденге ағаш салынды, терезе ауыстырылды, косметикалық жеңіл әрлеу жұмыстары жасалып, ыстық су ("аристон") орнатылды, оқшаулау бөлмесіне бақылау камерасы орнатылды. Бөлмеге теледидар, дамыту ойыншықтары және кітаптар қойылды" делінген мектеп әкімшілігінің хабарламасында.
Түркістан облысы прокуратурасының хабарлауынша, уәкіл шағымынан соң Төле би ауданының прокуратурасы балаларға қатігездік жасау фактісі бойынша тексеру бастаған. Тексеру нәтижесіне сай қылмыстық іс қозғау я қозғамау туралы шешім қабылданбақ.