Коррупциялык иштерден 1 млрд. сомдон ашык каражат өндүрүлдү
Коррупционерлерден өндүрүлгөн акча үчүн ачылган Борбордук казыналыктагы бирдиктүү депозиттик эсепке 1 млрд. 52,6 млн. сом түштү. Бул тууралуу Финансы министрлиги кабарлады.
Бул сумманын ичинен 497 млн. 916,1 миң сомду Экономикалык кылмыштар менен күрөшүү боюнча мамлекеттик кызмат (Финполиция) жана 194 млн. 905,5 миң сомду Улуттук коопсуздук боюнча мамлекеттик комитет (УКМК) которгон. Башкы прокуратура 357 млн. 657,7 миң сом жана Ички иштер министрлиги (ИИМ) 2 млн. 185,6 миң сом төккөн.
Коррупцияга каршы күрөштөн түшкөн акчанын депозиттик эсеби былтыр июлда президент Сооронбай Жээнбековдун буйругу менен түзүлгөн.
Башкы прокуратурага, Финансы полициясына, УКМКга жана ИИМге жемкорлордон кайтарылган каражатты ушул эсепке которуу милдети жүктөлгөн. Бийлик мындай жол менен коррупция менен күрөштө ачык-айкындуулукту камсыз кылуу мүмкүн болот деп эсептейт. (ErN)