Обвинителите во Киев побараа 15 години затвор за Јанукович

Украинските обвинители во судење за предавство против поранешниот претседател Виктор Јанукович побараа од судот во Киев затворска казна од 15 години за поранешниот проруски лидер.

Обвинителите Руслан Кравченко и Максим Крим денеска го поднесоа барањето за време на судењето на Јанукович во отсуство. Јанукович е обвинет за велепредавство, соучество во агресивна војна против Украина и соучество во активности насочени кон менување на државните граници на Украина.

Јанукович е во Русија, каде избега во февруари 2014 година поради зголемувањето на немирите и смртоносните акции на полицијата против демонстрантите на Еуромајдан во Киев.

Протестите беа поттикнати од одлуката на Јанукович да ги укине плановите за трговски договор со Европската унија. Десетици луѓе беа убиени кога полицијата се обидуваше да ги ублажи проевропските протести.