Затворање на католичките цркви во Шри Ланка поради страв од нови напади

Католичкиот кардинал во Шри Ланка, Малколм Ранџит, изјави дека добил „информација од странство“ дека оваа недела ќе има обид за напад врз црква и уште една црковна институција.

Во писмото кое тој денеска им ги испратил на католичките великодостојници и кое потоа се појави на социјалните мрежи, Ренџит наведува и дека ги затвора црквите и католичките училишта и ги откажува јавните собири за миси „до наредното известување“.

Портпаролот на Католичката црква во Шри Ланка, Едмунд Тилакаратне за новинската агенција Асошиејтед прес ја потврди автентичноста на писмото, но не наведе кој е извор на информациите дека ќе има напади, а не даде ни други детали.

Во велигденските напади врз цркви и хотели во Шри Ланка, кои ги изврши група поврзана со Исламската држава, загинаа 257 луѓе.