Владата ќе бара заем за изградба на нов Клинички центар

На денешната седница на Владата беше усвоена информацијата за изградба на Универзитетски Клинички центар. Владата го задолжи Министерството за финансии во соработка со Министерството за здравство да изготви барање за изразување на интерес за заем до финансиските институции за финансирање на изградбата на новиот Клинички Центар, соопшти Министерството за здравство.

Во исто време, се посочува, Владата го задолжи Министерството за здравство и Министерството за транспорт и врски за да ги дефинираат задолженијата и надлежностите на јавните претпријатија во Република Северна Македонија.

“По спроведени анализи, а врз основ на студијата за изводливост на проектот за преместување на Универзитетски Клинички центар, како и податоците доставени од клиниките е предложен концепт на интегриран објект, кој би можел да се развива на пет нивоа со потребна квадратура од апроксимативни 102.000 м2 за потребните 1.300 болнички легла, 20 операциони сали, четири ангиогравски сали, осум родилни сали и 65 амбулантни за специјалистичко консултативна дејност”, стои во соопштението.