Шекеринска-Бошковиќ: Балканот живее ново време

Северна Македонија и Црна Гора беа и остануваат посветени и искрени партнери, а за кратко и сојузници во рамките на НАТО. Двете земји имаат одлична билатерална соработка, која ќе продолжи да се реализира со исто темпо и во иднина, заклучија на денешната средба во Подгорица, министрите за одбрана Радмила Шекеринска и Предраг Бошковиќ.


„Црна Гора беше и остана наш важен сојузник, близок партнер кој безрезервно нè поддржа на нашиот пат кон Алијансата. Искрено ви се заблагодарувам за брзата ратификација на Пристапниот протокол, со што покажуваме дека Балканот живее во ново време во кое соседите, поблиски и подалечни, ни се и најблиски соработници“, рече министерката.


Шекеринска се осврна и на претстојната вежба што ќе се реализира на „Криволак“, „Одлучен удар“, чиј составен дел ќе бидат и припадници на црногорската војска.


Бошковиќ истакна дека одбранбената соработка со нашата земја е одлична и континуирана во сите области и дека ќе продолжи да се развива и во иднина, во рамки на Алијансата. Бошковиќ изрази задоволство што процесот на ратификација на Пристапниот протокол се одвива со забрзано темпо и дека многу наскоро, Северна Македонија ќе биде и полноправен член на Алијансата.