Новости за 13.02.2018

Најновите сателитски податоци покажуваат дека топењето на ледената покривка на Гренланд и на Антарктикот го забрзува растот на нивото на морињата. Научниците наведуваат дека со сегашната стапка, светските океани до крајот на овој век би биле во просек над 60 сантиметри повисоки од сегашната состојба. Студијата е базирана врз сателитски податоци собрани во изминативе 25 години. Со ова се потврдени претходните предвидувања и компјутерски симулации дека трендот постојано се забрзува.

Градоначалникот на Солун Јанис Бутарис изјави дека треба да се размисли за промена на името на солунскиот аеродром „Македонија“. „Не велам дека треба да се промени, но само јавно прашувам, да рзмислиме за тоа бидејќи името „Македонија“ „го подели светот, не подели нас“ и од тоа сите губиме“, рече Бутарис во изјава за грчката ТВ Скај. Според него, аеродромот би можел да го носи името на прославениот грчки кошаркар Никос Галис, кој, како што вели, е меѓународно призната личност и единствениот од Грција кој влезе во американската Куќа на славните.

Претседателот на Србија Александар Вучиќ ја завршува дводневната посета на Хрватска. Тој заедно со претседателката на Хрватска Колинда Грабар Китаровиќ ќе присуства на собранието на Српскиот народен совет. Вучиќ вчера освен со Китаровиќ разговараше и со хрватскиот премиер Андреј Пленковиќ. По овие разговори Вучиќ изрази уверување дека односите меѓу двете земји како и нивните економски односи ќе бидат значително унапредени.

Грчкиот премиер Алексис Ципрас го повика парламентот да ги испита политичарите за кои постои сомневање дека се вмешани во случајот со примање мито од швајцарската компанија за лекови „Новартис“. Тој притоа вети дека ќе преземе соодветни мерки доколку истрагата најде докази за таквото „неетичко однесување“.

Американскиот претседател Доналд Трамп му изразил сочувство на рускиот претседател Владимир Путин за авионската несреќа кај Москва во која загинаа 71 лице, соопшти Кремљ. Во соопштението се додава дека претседателите разговарале телефонски и за некои аспекти на блискоисточниот мировен процес пред состанокот на Путин во Москва со палестинскиот лидер Махмуд Абас.

Основниот суд во ги ослободи двајцата полицајци кои беа уапсени пред два дена под сомнение дека не го заштитиле местото на убиството на Оливер Ивановиќ, јавува „Коха диторе“. Веста за весникот ја потврди и главниот обвинител на Основното обвинителство во Митровица, Шуќри Суља. Обвинителството побара од судот едномесечен притвор за осомничените. Оливер Ивановиќ, водач на Граѓанската иницијатива на СДП, беше убиен на 16 јануари пред седиштето на партијата во Северна Митровица.

Нова средба во рамките на процесот на преговори за решавање на спорот со името меѓу Македонија и Грција, под посредништво на медијаторот Метју Нимиц на ниво на министери за надворешни работи ќе се одржи денеска во Виена, соопшти македонското Министерство за надворешни работи. Шефовите на дипломатиите на двете земји Никола Димитров и Никос Коѕијас синоќа се состанаа во Виена, а денеска ќе имаат заеднички состанок со Нимиц на кој е предвидено да се интензивираат преговорите и ќе го разгледаат предлогот на медијаторот. Читать дальше...

Во Македонија ќе биде облачно со врнежи кои долж Повардарието ќе бидат од дожд, а во другите делови и од снег. Попладне во западните делови врнежите ќе бидат пообилни и ќе предизвикаат позначително зголемување на снежната покривка. Ќе дува слаб до умерен ветер, а долж Повардарието тој ќе биде засилен од југоисточен правец. Температурата ќе се движи од минус 1 до 9 степени. Во Скопје и околината слично време со температура до 6 степени.