Новости за 19.12.2018

Американскиот претседател Доналд Трамп ќе учествува на Светскиот економски форум во Давос кој се одржува кон крајот на јануари 2019 година во Швајцарија, соопшти Белата куќа. Тоа е второ учество на Трамп на овој форум на кој се собираат истакнати политичари и деловни луѓе, како и научници, уметници. На собирот ќе учествуваат и други претставници на американската администрација како државниот секретар Мајк Помпео, министерот за финансии Стив Мнучин и министерот за трговија Вилбур Рос.

Британската влада реши да ги зајакне подготовките за можноста земјата да ја напушти Европската унија без договор со Брисел со ставање на војската во готовност и со предупредување до илјадници компании и милиони домаќинства дека ќе мора да се подготват на тешки денови. Иако Британија на 29 март идната година треба да ја напушти ЕУ засега не е познато дали британскиот парламент ќе го усвои договорот за Брегзит што премиерката Тереза Меј го постигна со Брисел. Минстерката за труд Амбер Рад во врска со најновите мерки изјави... Читать дальше...

Грчките пратеници го одобрија буџетот на оваа презадолжена земја за идната година. Ова е прв грчки буџет откако земјата излезе од осумгодишната програма за финансиска помош.

Белгискиот премиер Шарл Мишел објави пред пратениците во парламентот дека поднесува оставка поради притисокот врз неговата влада по излегувањето на најголемата коалициска партија. Белгиската влада мораше да биде реконструирана во минатата недела затоа што најголемиот коалициски партнер се спротивстави на одлуката на премиерот Мишел да го потпише Пактот за миграции, необврзувачки договор на Обединетите нации чија цел е да обезбеди организирана меѓународна миграција.

Претседателството на Босна и Херцеговина на вонредна седница смени 21 амбасадор и шест шефови на мисии и конзули. Претседавачот на Претседателството на БиХ Милорад Додик веднаш по преземањето на должноста најави дека смената на амбасадорите ќе биде еден од неговите први потези, бидејќи, како што тврди, тие до сега не ја контактирале Република Српска за ниту едно прашање. Смената на сите амбасадори од хрватска националност е израз на политички реваншизам, соопштија од ХДЗ. Освен хрватски, сменети се и српски амбасадори.

Владата на Македонија соопшти дека со Србија била постигната спогодба за заштита и спасување од природни и други катастрофи. Како што е соопштено, со спогодбата за која се завршени преговорите, се опфатени прашањата од областа на заштитата и спасувањето на населението и материјалните добра на билатерално ниво во случаи на големи катастрофи. Освен тоа, македонската влада оценува дека оваа спогодба е своевиден придонес за унапредување на регионалната соработка на Македонија со државите од нејзиното опкружување.

Во Македонија ќе биде сончево со мала до умерена облачност и со слаб до умерен северен ветер. Утринската температура ќе се движи од минус осум до нула, а дневната од нула до шест степени. Во Скопје и околината слично време со утринска температура до минус три, а со дневна до три степени.