МНР: Придонесите за вработените се исплаќаат редовно

Министерството за надворешни работи преку соопштение реагира на „изнесени невистини поврзани со здравственото осигурување на вработените“ во Министерството, откако претходно опозициската ВМРО-ДПМНЕ обвини дека македонската дипломатија три месеци била без здравствено осигурување.

МНР во соопштението вели дека платата на вработените во Министерството, како и во останатите државни институции согласно законската регулатива не би можела да биде исплатена „без уредно платени придонеси“ за здравствено и пензиско осигурување.

„Исто така факт е дека платата во МНР во континуитет се исплаќа редовно – платата за јуни 2019 година беше исплатена во текот на вчерашниот ден, 3 јули 2019 година“, велат од МНР.

Од Министерството упатуваат потврда на фактот за редовно уплаќање на задолжителните придонеси да се провери во УЈП, Фондот за пензиско осигурување и Фондот за здравствено осигурување.

ВМРО-ДПМНЕ претходно на прес-конференција обвини дека трет месец македонските дипломати, амбасадорите службите и ДКП-ата, не им се покрива здравствено осигурување.