Оставка на словачкиот министер за здравство поради набавката на руски вакцини
Оставка на министерот побараа две од четирите партии од владејачката коалиција на десницата и популистите, по критиките дека Словачка е меѓу најтешко погодените држави од епидемијата на ковид-19 во ЕУ.
Полска не планира да купува руска вакцина против коронавирус
Политичката криза минатата недела ја предизвика тајниот договор за набавка на руската вакцина против коронавирус Спутник Ве. И покрај несогласувањата меѓу коалиционите партнери, набавката ја организираше премиерот Игор Матович, а неговиот партиски колега, сега поранешен министер за здравство, затоа денеска поднесе оставка.
Премиерот ја бранеше набавката на два милиони вакцини Спутник Ве, наведувајќи дека така ќе се забрза вакцинацијата, партијата Слобода и солидарност смета дека со тоа се загрозува „јасната прозападна ориентација на земјата“.
Таа партија се здружи со уште еден партнер од владејачката коалиција, партијата За народ, и побараа реконструкција на владата. Тие наведуваа дека за секоја вакцина е потребно одобрување од регулаторното тело за лекови на ЕУ, што Спутник Ве сè уште го нема.
Во Словачка, која има 5,4 милиони жители, досега се регистрирани 331 илјади случаи на коронавирус, а над 8200 луѓе починаа. Со тоа Словачка е втора во светот според бројот на починати по жител, со 1720 починати на еден милион жители.
Поради пополнетост на болниците со ковид-пацинти, Словачка од другите членки на ЕУ побара помош во медицински персонал, а први се одзваа Данска, Белгија и Романија.