ИЈЗ: Минатата недела најмногу новозаразени има кај возрасната група од 10 до 19 години

Во периодот од 15 до 21 март 2021, тестирани се вкупно 24.517 материјали во лабораториите во кои се спроведува молекуларно тестирање и антигенско тестирање за присуство на ковид-19, со зголемување од 8,4% во однос на минатата недела, покажува најновиот неделн извештај на Институтот за јавно здравје (ИЈЗ).

„Регистрирани сe 6.899 нови позитивни случаи од 35 градови во државата со зголемување од 26,4% во однос на минатата недела. Најголем дел од регистрираните случаи се од Скопје, а највисока неделна инциденца е регистрирана во Неготино, заедно со Демир Капија. Процентот на позитивност се движи од 23,4 до 32,3%, просечно 27,9%, 3% повеќе во споредба со минатата недела“, се наведува во извештајот на ИЈЗ, објавен денеска.

Регистрирани се заболени лица во сите возрасни групи. Најзастапена е возрасната група на лица на возраст над 60 години, а голем број на заболени се регистрира и кај лицата во возрасните групи од 30-39. Најголемо процентуално зголемување во однос на претходната недела е забележано кај возрасните групи од 10-19 (33,1%), 50-59 (32,1%) и 40-49 (30,2%).

„Со статус „оздравени“ се стекнале 3.343 лица кои биле хоспитализирани или на домашно лекување, со зголемување од 22,1% во споредба со минатата недела“, покажува извештајот на ИЈЗ.

Пријавени се 158 смртни случаи од 27 градови, 22,5% повеќе во однос на минатата недела. Во однос на возраста, 135 лицa биле над 60 години, 19 лица на возраст од 50-59 години, три лица од возрасната група 40-49 години и едно лице на возраст од 30-39 години. Заклучно со 22 март 2021, вкупно се вакцинирани 6.704 здравствени работници со прва доза (4.002 – Фајзер и 2.702 – Спутник В) и 2.572 (Фајзер) со втора доза на вакцина против ковид-19.