ЕУ веќе не ја иззема Македонија од забраната за извоз на вакцини

Европската Комисија (ЕК) денеска воведе неколку промени во својот механизам за авторизација на извоз на вакцини кон трети земји, за да има поголема транспарентност во трговијата со вакцини. Со тоа земјите од западен Балкан нема повеќе да бидат изземени, вклучително и Македонија, јави МИА од Брисел. Овие промени следуваат откако Европската унија (ЕУ) се соочи со бројни проблеми околу испораката на вакцини од страна на фармацевтските компании и недостатокот на дози во земјите членки за да се вакцинира населението. Механизмот подразбира дека од сега натаму пропорционалноста и реципроцитетот ќе бидат водечки принципи на дозволите за извоз на вакцини кон трети земји.

Според претседателката на ЕК, Урсула фон дер Лајен, потребата од овие промени доаѓа од тоа што земјите на ЕУ се соочуваат со трет бран од Ковид-19, додека „некои компании не си ги почитуваат обврските од склучените договори за испорака на дози во ЕУ“.

Освен промените во делот на реципроцитет и пропорционалност, денешните измени во регулативата вклучуваат и 17 земји кои досега беа изземени од овој механизам за надзор на извозот, меѓу нив е и Македонија, како и сите други земји од регионот и уште 11 земји ширум светот. Остануваат изземени 92 земји со низок или среден приход како и извозот на вакцини за хуманитарни цели.