چارواکي: په شمالي وزیرستان کې چاودنې ۳ پاکستاني سرتېري وژلي
پاکستاني چارواکي وايي چې ډيورند کرښې ته څېرمه د سړک غاړې د بم په چاودنه کې درې پاکستاني سرتېري وژل شوي دي.
يوه دولتي چارواکي کرمان افريدي نن یکشنبه وويل، چاودنه د شمالي وزيرستان په غلام خان کلي کې شوې ده.
ويل کېږي چې په سيمه کې د پاکستاني طالبانو په ګډون له نورو افراطي وسله والو سره د پاکستان پوځ په پوځي مبارزه بوخت دى.
چارواکي وايي، دغه سرتېري د سرحدي ملېشه ځواکونو غړي وو.
په سيمه کې استخباراتي چارواکو د نوم نه ښوولو په شرط پېښه تائيد کړې ده.