چارواکي وايي، په فارياب کې يې ژمني پوځي عمليات په شدت روان دي
د افغانستان په شمال کې د ملي اردو چارواکي وايي، په فارياب ولايت کې يې ژمني پوځي عمليات په شدت روان دي.
د ٢٠٩ شاهين قول اردو مطبوعاتي مسؤل جګړن نصرت الله جمشيدي ازادي راډيو ته وويل، په دغو عملياتو کې د مخدره موادو د کارو بار ځايونه هم له منځه وړل کېږي:
"د دغو عملياتو عمده برخه دا ده هغه ځايونه په نښه کړو چې مخدره مواد په کې توليدېږي يا يې کارو بار کېږي. موږ په دې برخه کې ډېر جدي عمل کوو."
تر دې مخکې راپورونه ورکړل شوي وو چې د افغانستان په شمال کې د مخدره موادو د توليد او کاروبار زياتېدو په سيمه کې ناامني زياته کړې ده.
ويل شوي چې په پام کې ده دغه پوځي عمليات د فارياب ولايت تر څنګ په جوزجان او سرپل کې هم پيل شي.
په فارياب کې لا هم د عملياتو په نتيجه کې د مرګ ژوبلې په اړه څه نه دي ويل شوي دي.