ایسا: د چین یو غیرفعال فضايي لابراتوار ښايي بېرته پر ځمکه راپرېوځي
ایسا چې د «تیان ګانګ یو» په نوم د دې وسیلې لارې څاري، مخکې ځمکې ته د هغې د ستنېدو نېټه د مارچ ۳۱مه یا د اپریل لومړۍ ښودلې وه.
چینايي چارواکو ویلي، دا فضايي لابراتوار به چې وزن یې اته ټنه دی، ځمکې ته له رارسېدو سره سم کوم زیان وانه ړوي.
د چین د فضايي انجنیرۍ ادارې ویلي چې خلک دې نه وارخطا کېږي، ځکه چې دا وسیله به د ساینس فکشن فلمونو په څېر له ځمکې سره ټکر ونه کړي، بلکې د ټوټې کېدو پرمهال به په اسمان کې د لکۍ لرونکو ستورو په څېر یوه ښکلې منظره جوړه کړي.
د اروپايي ټولنې فضايي ادارې ویلي دي چې دا فضايي لابراتوار به د نیوزیلند او د متحدایالاتو د مرکز او لوېدیځ ترمنځ سیمو کې پرځمکه راپرېوځي.
چین دا لابراتوار په ۲۰۱۱ کال کې د فضايي تحقیقاتو لپاره فضا ته استولی و.