د لالیګا سیالیو په لړ کې ریال مادرېد لاس پالماس ته ماتې ورکړه
د هسپانیا د لالیګا سیالیو په لړ کې تېره شپه ریال مادرېد لاس پالماس ته ماتې ورکړه او د بارسلونا او سویا ترمنځ لوبه بیا دوه د دوه په وړاندې مساوي پای ته ورسېده.
د فیفا يا د فوټبال نړیوال فدراسیون د معلوماتو له مخې د ریال مادرېد او لاس پالماس ترمنځ لوبه کې رونالډو له دې امله ګډون نه درلود چې د یونټوس په وړاندې سیالۍ لپاره په تمریناتو بوخت و، خو د نوموړي په نشتون کې ګریټ بیل او کریم بنزیما د خپلې لوبډلې لپاره ګولونه ووهل.
خو د بارسلونا او سویا ترمنځ لوبه کې بیا بارسلونا د لوبې تر ۸۸ دقیقې پورې له ماتې سره مخ شو، خو د لوبې په پاتې دقیقو کې د مسي او سوارس په ګولونو سره لوبه دوه د دوه په وړاندې مساوي پای ته ورسېده.
د لالیګا سیالیو په جدول کې بارسلونا د ۷۶ امتیازونو سره لومړی، اتلتیکو مادرېد او ریال مادرېد د ۶۴ او ۶۳ امتیازونو سره دوهم او درېیم ځای کې قرار لري.